სახალხო დამცველის მიერ შექმნილი ექიმების კონსილიუმის წევრი, გიორგი გრიგოლია ამბობს, რომ თუ მიხეილ სააკაშვილი მედიკამენტებს მიღებას შეწყვეტს, მისი რეაბილიტაციის პროცესი გაუარესდება.
როგორც ექიმი აღნიშნავს, ყოფილი პრეზიდენტისთვის მედიკამენტების მიღება აუცილებელია.
"მიხეილ სააკაშვილი ადეკვატურად არ იკვებება, ამას სჭირდება დრო, რომ გადავიდეს საკვების იმ რაოდენობაზე, რაც მისი ორგანიზმისთვისაა საჭირო, ამიტომ მედიკამენტების მიღება არის აუცილებელი. თუ ის შეწყვეტს მედიკამენტების მიღებას, რა თქმა უნდა, გაუარესდება რეაბილიტაციის პროცესი და შეიძლება, თავიდან დაიწყოს ის ცვლილებები, რაც მას კვების შეწყვეტის დაწყების წინ ჰქონდა", - თქვა გრიგოლიამ.
ბოლო რამდენიმე დღეა პარლამენტის დეპუტატები მიხეილ სააკაშვილის მონახულებას ვერ ახერხებენ. ადვოკატ ბექა ბასილაიას თქმით, თუ დეპუტატებს არ შეუშვებენ გორის ჰოსპიტალში, მიხეილ სააკაშვილი მკურნალობას შეწყვეტს და ამაზე მას "მკაფიო პოზიცია" აქვს.
მიხეილ სააკაშვილი 50 დღის განმავლობაში შიმშილობდა.
იუსტიციის სამინისტრომ სააკაშვილს გორის სამხედრო ჰოსპიტალში გადაყვანა შესთავაზა. ის გლდანის ციხის საავადმყოფოდან გორის სამხედრო ჰოსპიტალში გადაყვანას 19 ნოემბერს დათანხმდა. ამჟამად სააკაშვილი რეაბილიტაციის კურსს გადის.
დახურვა