პრეზიდენტი სალომე ზურაბიშვილი უკრაინაში 5 ქართველი მებრძოლის დაღუპვას ეხმაურება და მათ ოჯახებს უსამძიმრებს.
"დღეს ხუთი ქართველი დაიღუპა ბახმუტთან ბრძოლაში. ამ მძიმე წუთებში, ვუსამძიმრებ უკრაინაში დაღუპული ყველა ქართველი მებრძოლის ოჯახებს, მეგობრებსა და ახლობლებს", - წერს ზურაბიშვილი.
აღსანიშნავია, რომ ამ დრომდე მებრძოლების დაღუპვას ხელისუფლების არც ერთი სხვა წარმომადგენელი არ გამოეხმაურა. ცნობები ქართველი გმირების დაღუპვის შესახებ საქართველოს დროით 19:00 საათვისთვის გავრცელდა.
პრეზიდენტ ვოლოდიმირ ზელენსკის განცხადებით, ყველაზე ცხელი წერტილი ამ დროისთვის ბახმუტი რჩება. მისი თქმით, ყველა მებრძოლი ვინც ამ ტერიტორიაზე იმყოფება "უმაღლეს მადლიერებას იმსახურებს".
გარდა ამისა, უკრაინაში ქართველი მებრძოლის რომეო ფარულავას ინფორმაციით, დონეცკის ოლქის ქალაქ ბახმუტში, ქართველი მებრძოლების ნაწილი, უკრაინელებთან ერთად, ალყაშია. ფარულავა შაბათის ფორმულასთან საუბარში ამბობს, რომ ალყაში ასევე ქართველი მეთაურია, რომელიც დაჭრილია. მებრძოლის თქმით, დაჭრილების გამოსაყვანად ყველაფერს აკეთებენ, მათ შორის დაწყებულია დაღუპულების ცხედრების გამოყვანის ოპერაციაც.
დახურვა