თავდაცვის მინისტრობის კანდიდატი ჯუანშერ ბურჭულაძე ამბობს, რომ სავალდებულო ჯარი გავლილი არ აქვს. ამის შესახებ მას კომიტეტების გაერთიანებულ სხდომაზე პარტია მოქალაქეების ლიდერმა ალეკო ელისაშვილმა ჰკითხა.
მინისტრობის კანდიდატმა კითხვას ასე უპასუხა:
"სავალდებულო ჯარი არ მაქვს გავლილი, სამწუხაროდ. თავი არ ამირიდებია, ეს იყო იმით განპირობებული, რომ 17 წლის ასაკში შევქმენი ოჯახი, შემეძინა შვილი, შემდეგ 20 წლის ასაკში დავიწყე მუშაობა", - თქვა მან.
ბურჭულაძე ამ პოსტზე 19 თებერვალს წარადგინეს. თავდაცვის მინისტრის თანამდებობა მას შემდეგ გახდა ვაკანტური, რაც ქართულმა ოცნებამ პრემიერმინისტრობის კანდიდატად ირაკლი ღარიბაშვილი წარადგინა, რომელიც მანამდე თავდაცვის მინისტრის პოსტს იკავებდა.