პაატა იმნაძის განცხადებით, თეთრიწყაროში ინფიცირებულთა რაოდენობა 20-ს აღწევს.
როგორც დაავადებათა კონტროლის ეროცნული ცენტრის სამეცნიერო ხელმძღვანელმა განმარტა, უმრავლესობა მედიცინის მუშაკია. იმნაძე იმედს გამოთქვამს, რომ თეთრიწყაროში აფეთქება არ მოხდება და დაავადების შეჩერება შესაძლებელი იქნება.
„თეთრიწყაროში მთელ დღეს იმუშავა ჩვენმა ჯგუფმა - გამოვლინდნენ ინფიცირებულები, ბევრია ჩვენი კოლეგა. თეთრიწყაროში გვაქვს 20-მდე დადებითი შემთხვევა - მომუშავე ჯგუფი გზაშია და იმედია, შეკავება მოხდება დროულად. გამოკვლეული იყო კონტაქტები და, ფაქტობრივად, ნახევარი დადებითი აღმოჩნდა. ჩატარდა მიზნობრივი ტესტირება", - განაცხადა პაატა იმნაძემ.
საქართველოში კორონავირუსის 485 დადასტურებული შემთხვევაა აღრიცხული - აქედან 139 ადამიანი გამოჯანმრთელდა, ხოლო 6 გარდაიცვალა.
ქვეყანაში ვირუსით ინფიცირების პირველი შემთხვევა 26 თებერვალს დადასტურდა.
დახურვა