პარტია მოქალაქეების წევრი ლევან იოსელიანი პარლამენტში საარჩევნო რეფორმასთან დაკავშირებული საკანონმდებლო პაკეტის დარეგისტრირებას ეხმაურება და ამბობს, რომ მთავარი მიზანი, რის გამოც ის და ალეკო ელისაშვილი პარლამენტში შევიდნენ, მიღწეულია.
"ახლა გინდ ვადამდელი არჩევნები ჩატარდეს, გინდ 2024 წელს ვადამდელის გარეშე, ერთი რამ მეცოდინება, ეს არჩევნები იმ პრინციპით ჩატარდება, რომელიც ყველა პარტიას, ყველა საარჩევნო სუბიექტს სამართლიან და თანასწორ გარემოს შეუქმნის სულ მცირე არჩევნების დღეს. და ამით ჩემ თავთან ვიქნები მართალი, რომ უფრო გრძელვადიანი და საშვილიშვილო მნიშვნელობის საკითხი პოლიტიკურ კრიზისს არ გადავაყოლე. გავითვალისწინეთ ეუთო ოდირის რეკომენდაციები და ამ ყველაფერს საკანონმდებლო ინიციატივის სახე მივეცით", - წერს იოსელიანი Facebook-ის საკუთარ გვერდზე.
მისივე ინფორმაციით, საკანონმდებლო პაკეტის თანახმად:
- ცესკოს კომისიები, ყველა დონეზე დაკომპლექტდება ახალი წესით. ყველა პარტიას ეყოლება ცენტრალურ და საოლქო კომისიაში საკუთარი წევრი, უბნებზე ყველას- წარმომადგენელი, რომელსაც ცესკო გადაუხდის თავად ხელფასს, რაც ყველა შეზღუდული რესურსის მქონე პარტიას მნიშვნელოვნად დაეხმარება, საკუთარი ხმები დაიცვას
- ადამიანების იდენტიფიკაცია, ამ კანონმდებლობით შესაძლებელი იქნება, რომ თითის ანაბეჭდით მოხდეს და არა მხოლოდ პირადობის დამადასტურებელი მოწმობით, რითაც უფრო მარტივად ავიცილებთ თავიდან კარუსელებს.
- ხმების დათვლა შესაძლებელი იქნება ელექტრომანქანებით, რითიც ოქმების გადაჯღაბნა და შესწორება შეუძლებელი გახდება.
- თვითმმართველობის არჩევნებზე იქნება ყველგან ბუნებრივი ბარიერი და გაზრდილი პროპორციული პრინციპი, თბილისსა და დიდ ქალაქებში 4/1 -ზე პრინციპით (40 პროპორციული, 10 მაჟორიტარი) და დანარჩენ მუნიციპალიტეტებში 2/1-ზე.
- ვალდებულება ეკისრება საოლქო კომისიებს, რომ უბნების სულ მცირე 10 % მაინც გადათვალოს, შესაბამისად დაუკმაყოფილებელი საჩივრები, რომ აღარ გადათვლიან, ვეღარ გვექნება.
საჯარო მოხელეები, პედაგოგები, საბავშო ბაღის მასწავლებლები ვერ მიიღებენ მონაწილეობას საარჩევნო აგიტაციაში. დაისჯება 2000 ლარიანი ჯარიმით.
- ცვლილებებით, დაუშვებელი ხდება, კენჭისყრის დღეს შენობიდან 100 მეტრის მანძილზე ამომრჩევლის გადაადგილების ფიზიკურად შეფერხება, რაც არჩევნების დღეს „ძველი ბიჭების“ ინსტიტუტს“ შეასუსტებს. ეს ყველაფერი 2000 ლარიანი ჯარიმით დაისჯება.
იოსელიანის განცხადებით, ერთადერთი საკითხი, რაც ღია რჩება, ეს საპარლამენტო არჩევნებზე ბარიერის დაწევაა, რასაც საკონსტიტუციო უმრავლესობა სჭირდება.
"ქვეყნის ინტერესებიდან გამომდინარე ვიწროპარტიულ ინტერესს ყველამ უნდა გადააბიჯოს და ერთჯერადად მაინც უნდა შემოვიდნენ პარტიები პარლამენტში, რომ მომდევნო არჩევნებზე დაირღვეს პოლარიზებული პოლიტიკური გარემო, თორემ 2024 წელს მაღალი ბარიერის პირობებში, პარლამენტში მხოლოდ ისევ ორი დიდი პოლიტიკური ძალა მოხვდება და კიდევ უფრო დავშორდებით მრავალპარტიული პარლამენტის და ევროპული ყაიდის სახელმწიფოს იდეასაც", - წერს ლევან იოსელიანი.
პარლამენტში "მოქალაქეების" და "ოცნების" მემორანდუმის ფარგლებში საარჩევნო რეფორმის საკანონმდებლო პაკეტი დღეს, 2 მარტს დარეგისტრირდა.
მოქალაქეების წევრები, ლევან იოსელიანი და ალეკო ელისაშვილი პარლამენტში, როგორც თავად თქვეს, იმ პირობით შევიდნენ, რომ საარჩევნო სისტემის რეფორმა მოხდებოდა. 29 იანვარს ალეკო ელისაშვილმა თქვა, რომ იმ შემთხვევაში, თუ შესაბამისი კანონპროექტი 1-ლ მარტამდე არ დარეგისტრირდებოდა, ისინი პარლამენტს დატოვებდნენ.
მათივე განცხადებით, ცვლილებების კანონპროექტი 1-ლ მაისამდე უნდა იქცეს კანონად.
დახურვა