ღამის კლუბები მათი მუშაობის ისევ აკრძალვასთან დაკავშირებით აცხადებენ, რომ პანდემიასთან ბრძოლის ახალი, სამართლიანი და არადისკრიმინაციული გეგმის შემუშავებამდე ისინი გააგრძელებენ მუშაობას.
მათივე ცნობით, კლუბები იფუნქციონირებენ 2022 წლის 14-15 იანვრის დღეებშიც, აქამდე არსებული შეთანხმებისა და რეგულაციების შესაბამისად.
კლუბები ასევე აღნიშნავენ, რომ ინფორმაცია, თითქოს ისინი შემდეგი ორი კვირის განმავლობაში დაიხურებიან, ხოლო ამის სანაცვლოდ დაზარალებული სივრცეები კომპენსაციას მიიღებენ, არ შეესაბამება სიმართლეს. მათი თქმით, ეს არ ყოფილა საქართველოს მთავრობასა და კლუბებს შორის ერთობლივად მიღწეული გადაწყვეტილება.
"ჩვენთვის ცნობილია, რომ შესაბამისი უწყებების მხრიდან წარმოდგენილი იყო ეს შეთავაზება, თუმცა სივრცის მფლობელებსა და თბილისის საკლუბო სცენის წარმომადგენლებს შემხვედრი პასუხი ამ ეტაპამდე არ გაგვიცია.
ეჭვგარეშეა, რომ ისეთი რადიკალური ნაბიჯების შესახებ, როგორიცაა დაგეგმილი და დაანონსებული ღონისძიებების მოულოდნელი გაუქმება, შესაბამისი ღონისძიების ორგანიზატორებს უნდა ეცნობოთ გონივრულ ვადაში, რადგან საკლუბო სცენის წარმომადგენლები ამ ეტაპამდე კეთილსინდისიერად ვხელმძღვანელობთ შესაბამის უწყებებთან შეთანხმებული რეგულაციების დაცვით, ხოლო ახალი ზომები უსაფრთხოებისა და ჯანდაცვის რეგულაციების შესახებ ჯერ დადასტურებული არაა, რისი ერთ-ერთი მიზეზიც არის თავად მთავრობის მხრიდან შესაბამისი შეხვედრების გადავადება', - ნათქვამია განცხადებაში.
მათივე აღნიშვნით, თავად სახელმწიფო სთავაზობდათ და მხარს უჭერდა 31 დეკემბრიდან - 16 იანვრამდე ღონისძიებების ჩატარების იდეას, ხოლო მომდევნო ღონისძებების ჩატარების წესებსა და პროტოკოლზე იანვრის დასაწყისში უნდა ემსჯელათ.
"ვთვლით, რომ მოთხოვნა ცალმხრივად განხილული გადაწყვეტილების დაცვის და 14-15 იანვრის დაანონსებული ღონისძიებების გაუქმების, რომლის დასაორგანიზებლადაც ისედაც მძიმე ეკონომიკურ მდგომარეობაში მყოფმა სივრცეებმა დიდი ხარჯი გავწიეთ, არის არალეგიტიმური და არ ეფუძნება შეთანხმებაზე დაფუძნებული ორმხრივი თანამშრომლობის პრინციპებს.
უტყუარია, რომ ჩვენს მიერ გატარებული უსაფრთხოებისა და ჯანდაცვის მექანიზმები ჩვენს სივრცეებს ყველაზე დაცულ ადგილებს აქცევს მიმდინარე პანდემიაში, რაც, თავის მხრივ, არ ნიშნავს, რომ ვირუსის გავრცელების რისკები ნულამდეა დაყვანილი. აქამდე ჩატარებული ყველა კვლევით, საკლუბო სივრცეებში ვირუსის გავრცელების რისკი რამდენჯერმე ნაკლებია გარე გავრცელების რისკებთან შედარებით.
ჩვენ, როგორც პასუხისმგებლობის მქონე და უსაფრთხო სივრცის იდეის ერთგული წარმომადგენლები, ვიზიარებთ იმ მოსაზრებასაც, რომ ვირუსის ახალი შტამის, “ომიკრონის” გავრცელებამ შეცვალა სურათი არამხოლოდ საკლუბო სცენაზე, არამედ მთელს ქვეყანაში.
შესაბამისად მიგვაჩნია, რომ იმ შემთხვევაში, თუ განიხილება სახელმწიფოს მხრიდან ახალი ზომების შემოღება და გამკაცრება, ეს რეგულაციები უნდა ეხებოდეს ყველა სარისკო სივრცეს და არამხოლოდ კლუბებს, ხოლო სახელმწიფოს მხრიდან გადაწყვეტილების მიღებამდე და შეთანხმების მიღწევამდე წარმოდგენილი უნდა იყოს ვირუსთან ბრძოლის იმგვარი სამოქმედო გეგმა, რომელიც გამორიცხავს კლუბების მიმართ კიდევ ერთხელ არასამართლიან და დისკრიმინაციულ მიდგომას", - ნათქვამია მათ განცხადებაში.
გუშინ, 12 იანვარს გავრცელდა ინფორმაცია, რომ საქართველოს მთავრობის გადაწყვეტილებით, ღამის კლუბებს მუშაობის უფლება ისევ შეეზღუდათ.
დახურვა