კობახიძე საარჩევნო სისტემის ცვლილებაზე: დიალოგისთვის მზად ვართ

საპარლამენტო უმრავლესობის წევრმა ირაკლი კობახიძემ საარჩევნო სისტემის ცვლილებასთან დაკავშირებით ისაუბრა და განაცხადა, რომ არის რესურსი, რათა შეთანხმება შედგეს.

კობახიძის თქმით, საკონსტიტუციო ცვლილებებს 4 თვე სჭირდება და კარგი იქნება, თუ შეთანხმება შედგება თებერვლის ბოლოს.

„ჩვენ გვაქვს შეთავაზება წარდგენილი და ეს არის 100/50-ზე. თუმცა, განვაცხადეთ, რომ დიალოგისთვის მზად ვართ. სადამდე მიგვიყვანს ეს საუბარი, არის ოპოზიციის კონსრუქციულობაზე დამოკიდებული. თუ კონსესუსია, რომ რა მოთხოვნასაც "ნაციონალური მოძრაობა" დააყენებს, ეს სხვაა და ჩვენ მზად ვართ წარვადგინოთ შეთავაზება, მოვუსმინოთ ოპოზიციას და საბოლოოდ, შევჯერდეთ რაღაცაზე.

"თუ კონკრეტულ პარტიას აქვს თვითმიზანი, რომ შეთანხმება არ შედგეს, მაშინ შეთანხმება ვერ შედგება. იმისთვის, რომ საკონსტიტუციო ცვლილებები მივიღოთ 4 თვეა საჭირო. ამიტომ ვამბობ, რომ თუ თებერვლის ბოლოს შედგება შეთანნხმება, ივნისის ბოლოს ესწრება პაკეტის მიღება", - განაცხადა კობახიძემ.  

შეგახსენებთ, რომ პარლამენტის თავმჯდომარემ საარჩევნო სისტემასთან დაკავშირეით ისაუბრა და განაცხადა, რომ იმ შემთხვევაში, თუ ოპოზიცია მმართველ გუნდთან შეთანხმებას ვერ შეძლებს, ეს ნიშნავს, რომ პოლიტიკური პარტიების ამ სპექტს, ქვეყნის განვითარება და წინსვლა არ სურს.

მმართველმა გუნდმა არ შეასრულა დაპირება და პროპორციულ საარჩევნო სისტემაზე გადასვლის კანონპროექტი ჩააგდო, რის შემდეგაც ოპოზიციურმა პარტიებმა და სამოქალაქო აქტივისტებმა დაიწყეს აქციები ერთადერთი მოთხოვნით - 2020 წლის საპარლამენტო არჩევნები გამართულიყო პროპორციული საარჩევნო სისტემით. ხელისუფლების წარმომადგენლები აცხადებენ, რომ არჩევნები პროპორციული სისტემით არ ჩატარდება და საკითხი განხილვას არ ექვემდებარება. ამავდროულად „ოცნების“ მაჟორიტარი დეპუტატები გამოვიდნენ ინიციატივით, რომ შეიცვალოს საარჩევნო სისტემა და ის სრულად მაჟორიტარულზე გადავიდეს. 

დიპლომატიური კორპუსის შუამდგომლობით ხელისუფლებისა და ოპოზიციის წარმომადგენლების უკვე 4 შეხვედრა გაიმართა. შეხვედრაზე მმართველმა გუნდმა საკუთარი პოზიცია კიდევ ერთხელ დააფიქსირა, რომ მათთვის მისაღები არც ოპოზიციის მიერ შეთავაზებული ე.წ. გერმანული მოდელია და ის კონსტიტუციას არ შეესაბამება.

მეოთხე შეხვედრის დასრულების შემდეგ, მმართველმა გუნდმა ახალი ინიციატივა წარადგინა, რომლის მიხედვითაც ოპოზიციას შერეული სისტემის შენარჩუნებას სთავაზობენ, თუმცა გაზრდილი იქნება პროპორციული მანდატების რაოდენობა, მაჟორიტარულის კი შემცირდება. კერძოდ, მაჟორიტარი დეპუტატების რაოდენობა იქნება 50, ხოლო პროპორციული საარჩევნო სისტემით არჩეული დეპუტატების რაოდენობა 100. მმართველი გუნდის წევრების თქმით, ეს შეთავაზება საბოლოოა.

ოპოზიციისთვის 100/50-ის სისტემა მიუღებელია. ისინი მოითხოვენ, რომ არჩევნები ან სრულად პროპორციულად, ან ე.წ. გერმანული მოდელით ჩატარდეს. მათი განცხადებით, ეუთო/ოდირის დასკვნის თანახმად, აღნიშნული მოდელი კონსტიტუციასთან შესაბამისობაში მოდის.

ოპოზიციასა და მმართველ გუნდს შორის, საერთაშორისო პარტნიორების მედიატორობით, შეხვედრის მეხუთე რაუნდი, „ფორმულას“ ინფორმაციით, 11 თებერვალს უნდა გამართულიყო.

აღსანიშნავია, რომ მმართველ გუნდს ამერიკელი კონგრესმენები და სენატორები ღიად მოუწოდებენ, რომ შეასრულონ დაპირება და საპარლამენტო არჩევნები პროპორციული საარჩევნო სისტემით ჩაატაროს.

თუმცა, ოპოზიცია მოლაპარაკებათა მაგიდასთან დაბრუნებას არ აპირებს. როგორც ისინი აცხადებენ, საარჩევნო სისტემასთან დაკავშირებით მიმდინარე დიალოგი ხელისუფლებამ მაშინ ჩაშალა, როდესაც, უზენაესი სასამართლოს გადაწყვეტილებით, გიგი უგულავა სამწლიან პატიმრობაში გაუშვა. 

ამ საკითხს ხელისუფლების წარმომადგენლებიც გამოეხმაურნენ. პარლამენტის თავმჯდომარე არჩილ თალაკვაძე ამბობს, რომ 2020 წელს არჩევნები 100/50 პროპორციით გაიმართება, 2024 წლისთვის კი საქართველო სრულად პროპორციულ სისტემაზე გადავა. თალაკვაძის თქმით, თუ ოპოზიცია ამ შეთავაზებას არ დათანხმდება, მომავალი არჩევნები კონსტიტუციით გათვალისწინებული კანონით ჩატარდება.