ქართული ოცნების თავმჯდომარე ირაკლი კობახიძე ამბობს, რომ პრეზიდენტ სალომე ზურაბიშვილის მიმართ გარკვეული რიტუალები აღარ შესრულდება, მაგალითად მას ფეხზე აღარ წამოუდგებიან.
კობახიძე იმედთან ამბობს, რომ "სალომე ზურაბიშვილი კონსტიტუციის დამრღვევი თანამდებობის პირია".
"რა თქმა უნდა, ჩვენ გაგვიჭირდება იმ რიტუალების შესრულება, რომელსაც მანამდე ვასრულებდით. როგორიც არის, მაგალითად, ფეხზე წამოდგომა პარლამენტის სხდომათა დარბაზში მისი შემოსვლის დროს და ასე შემდეგ.
რა თქმა უნდა, ეს ყველაფერი ამაზე აისახება და ბუნებრივია, ეს არ არის ეთიკის წესების წინააღმდეგ მიმართული ქმედება, ეს არის იმ რიტუალის არ შესრულება, რომელიც სრულდებოდა სრულფასოვანი პრეზიდენტის მიმართ.
გამომდინარე იქიდან, რომ ის რჩება მხოლოდ ფორმალურ პრეზიდენტად, ნაცმოძრაობის პრეზიდენტად, ჩვენი მხრიდან ასეთი რიტუალები, რა თქმა უნდა, აღარ შესრულდება", - თქვა კობახიძემ.
პარლამენტის სხდომათა დარბაზში შესვლის დროს ქართული ოცნების დეპუტატები სალომე ზურაბიშვილს ფეხზე არ წამოუდგნენ.
პარლამენტში ზურაბიშვილის იმპიჩმენტი ჩავარდა, რადგან ქართულმა ოცნებამ საჭირო 100 ხმა ვერ მოაგროვა - ზურაბიშვილის გადაყენებას მხარი 86-მა დეპუტატმა დაუჭირა.
პარლამენტში იმყოფებოდა თავად ზურაბიშვილიც.
საკითხის პარლამენტში გადმოტანამდე საქართველოს საკონსტიტუციო სასამართლომ დაადგინა, რომ პრეზიდენტმა კონსტიტუცია დაარღვია.
სასამართლოს 9 წევრიდან განსხვავებული პოზიცია 3-მა დააფიქსირა - ირინე იმერლიშვილმა, გიორგი კვერენჩხილაძემ და თეიმურაზ ტუღუშმა.
საკონსტიტუციო სასამართლომ პრეზიდენტის იმპიჩმენტის წარდგინების განხილვა 5 ოქტომბერს დაასრულა. პლენუმი სამი დღის განმავლობაში უსმენდა მხარეებს.
სხდომებს არ დასწრებია პრეზიდენტი სალომე ზურაბიშვილი. მის ინტერესებს სასამართლოზე იცავდნენ თამარ ჩუგოშვილი - პარლამენტის ყოფილი ვიცე-სპიკერი და ქართული ოცნების ყოფილი წევრი, და მაია კოპალეიშვილი - საკონსტიტუციო სასამართლოს ყოფილი მოსამართლე.
წარდგინების ავტორების მხრიდან სხდომაზე მომხსენებლები იყვნენ ირაკლი კობახიძე, ანრი ოხანაშვილი, გიორგი კახიანი და თენგიზ შარმანაშვილი.
პირველ სექტემბერს ცნობილი გახდა, რომ ქართული ოცნება სალომე ზურაბიშვილის წინააღმდეგ იმპიჩმენტის პროცედურას იწყებს. მიზეზად პარტიაში მთავრობის უარის მიუხედავად, პრეზიდენტის ევროპაში გამგზავრება დაასახელეს, რითაც მან "უხეშად დაარღვია კონსტიტუცია".
30 აგვისტოს საქართველოს მთავრობამ პრეზიდენტ სალომე ზურაბიშვილის ევროპაში ვიზიტის პარალელურად განცხადება გამოაქვეყნა და აღნიშნა, რომ მას ყველა მოთხოვნილ ვიზიტზე უარი უთხრეს, მათ შორის, უკრაინაში.
№1797 კონსტიტუციურ წარდგინებაში განხილვის საგანს წარმოადგენს საქართველოს კონსტიტუციის 52-ე მუხლის პირველი პუნქტის "ა" ქვეპუნქტის შესაძლო დარღვევა, საქართველოს პრეზიდენტის მიერ საქართველოს მთავრობის თანხმობის გარეშე, საგარეო ურთიერთობებში წარმომადგენლობითი უფლებამოსილების განხორციელების გამო, რაც გამოიხატა საზღვარგარეთ სამუშაო ვიზიტების განხორციელებით და ოფიციალურ პირებთან სამუშაო შეხვედრებისა და მოლაპარაკებების გამართვით.
კერძოდ, საუბარია სამ სამუშაო ვიზიტზე: 2023 წლის 31 აგვისტოს გერმანიის ფედერაციული რესპუბლიკის პრეზიდენტთან, 2023 წლის 1 სექტემბერს ევროპული საბჭოს პრეზიდენტთან და 2023 წლის 6 სექტემბერს საფრანგეთის პრეზიდენტთან.
დახურვა