მდინარაძე რამიშვილზე: სასამართლოს გარეშე ადამიანების გასამართლებას არ ვეთანხმები

ქართული ოცნების აღმასრულებელი მდივანი მამუკა მდინარაძე  POSTV-ის ხელმძღვანელზე, შალვა რამიშვილზე დასმულ კითხვას პასუხობს, რომ "სასამართლოს გარეშე ადამიანების გასამართლებას" ის არ ეთანხმება.

მდინარაძემ ასევე განაცხადა, რომ ის ყველა ქალს უჭერს მხარს, რომელიც "რეალურად" არის მსხვერპლი.

"მე ყველა ქალს ვუჭერ მხარს, რომელიც არის რეალური მსხვერპლი, რომელიც განიცდის დევნას, შევიწროებას, ძალადობას, აბსოლუტურად ყველას და არ უნდა არსებობდეს ადამიანი, რომელიც სხვანაირად აზროვნებს და ეს არის პრიორიტეტული თემა.
რაც შეეხება [რამიშვილს], სასამართლოს გარეშე ადამიანების გასამართლების თქვენეულ მცდელობას, მე ამას უბრალოდ არ ვეთანხმები. გუშინ გაირკვა, რომ [რამიშვილს] სასამართლო წაგებული აქვს არახელსაყრელი პირობების შექმნისათვის, სამოქალაქო სასამართლო და არა სისხლის სამართლის წესით და დაკისრებული აქვს 2 000 ლარის გადახდა, რომელიც მას ჰქონია გადახდილი და გუშინდელ დღემდე მეც მეგონა, რომ სისხლის სამართლის წესით იყო დამნაშავედ ცნობილი, თურმე სამოქალაქო წესით.[...] მართლაც ძალიან უსიამოვნო მოსასმენი იყო რაც ჩანაწერებში ვნახეთ, გიდასტურებთ მთელი პასუხისმგებლობით, მაგრამ შესაბამის კვალიფიკაციაზე, ეს სამოქალაქოა, ადმინისტრაციულია, დანაშაულია ანუ სისხლია თუ არა, ეს უნდა გადაწყვიტოს სასამართლომ და არა მე და თქვენ."- ამბობს მდინარაძე.

* * * 

ჟურნალისტმა მაკო ჯაბუამ რამიშვილი სექსუალურ შევიწროებაში 21 მარტს ამხილა. ამის შემდეგ რამიშვილი სექსუალურ შევიწროებაში კიდევ რამდენიმე ქალმა ამხილა. მათი ისტორიები მსგავსია. როგორც ქალები ამბობენ, ისინი გასაუბრების დროს შეავიწროვეს. სექსუალური შევიწროების ბრალდებებს უარყოფს შალვა რამიშვილი.

ისტორიების მოყოლის შემდეგ ორგანიზებული თავდასხმა დაიწყო თათია სამხარაძის მიმართ. თათია სამხარაძე ერთ-ერთია, ვინც POSTV-ის ხელმძღვანელი, შალვა რამიშვილი სექსუალურ შევიწროებაში ამხილა. მან რამიშვილს ტელეკომპანია იმედში ყოფნის დროს, 2016 წელს უჩივლა. 2018 წლის 3 იანვარს შალვა რამიშვილს სექსუალური შევიწროების საქმეზე საქალაქო სასამართლომ მორალური ზიანის ასანაზღაურებლად 2 000-ლარიანი ჯარიმა დააკისრა. რამიშვილმა პირველი ინსტანციის გადაწყვეტილება სააპელაციო სასამართლოში გაასაჩივრა, თუმცა მოსამართლემ საქალაქო სასამართლოს გადაწყვეტილება ძალაში დატოვა. ორი ინსტანციის გადაწყვეტილება რამიშვილს უზენაეს სასამართლოში აღარ გაუსაჩივრებია. 

26 მარტს სამხარაძემ Facebook-ზე ვიდეო გამოაქვეყნა, რომელშიც ამბობს, რომ სამთავრობო პროპაგანდისტული POSTV იტყუება, თითქოს ის დიმა ჩიქოვანის სახლიდან ვერ გამოდის, რადგან ჩალურჯებები აქვს. სამხარაძემ ამის საპირისპიროდ ვიდეო სახლიდან ჩაწერა, რომელშიც ჩანს, რომ დაზიანებები არ აქვს.

112-ში პროპაგანდისტული ტელევიზიის POSTV-ის მიერ განხორციელებული ცრუ შეტყობინების გამო 24 მარტს გვიან ღამით ნაციონალური მოძრაობის წევრის დიმა ჩიქოვანის საცხოვრებელ სახლში პოლიცია მივიდა და საგამოძიებო მოქმედებები ჩაატარა.