რუსეთმა შესაძლოა 20-დან 30-მდე პოლიტპატიმარი და ჟურნალისტი გაათავისუფლოს - ეს დასავლეთთან გარდაუვალი გაცვლის დროს უნდა მოხდეს. აღსანიშნავია, რომ დადასტურების შემთხვევაში ეს იქნება ყველაზე დიდი გაცვლა ცივი ომის დასრულების შემდეგ.
მანამდე დამოუკიდებელ რუსულ მედიაში ვრცელდებოდა ინფორმაცია, იმის შესახებ რომ გაცვლისთვის 10-მდე ცნობილი პოლიტპატიმრის გათავისუფლება იგეგმებოდა.
წყარო ამბობს, რომ "აქვს ინფორმაცია უფრო მეტ პოლიტპატიმარზე, ვიდრე მანამდე დასახელდა".
"ჩემი ვარაუდით რუსეთი დაახლოებით 20-დან 30-მდე ადამიანს გადასცემს დასავლეთს", - თქვა Politika.Kozlov-ის წყარომ, რომელმაც ანონიმურობის პირობით ისაუბრა.
ბოლო დღეებში იზრდებოდა ვარაუდი იმის შესახებ, რომ პატიმართა გაცვლა ჰორიზონტზეა, რადგან რამდენიმე პოლიტპატიმარი და ჟურნალისტი ციხის საკნიდან უცნობ ადგილებში გადაიყვანეს. იმ პატიმრებს შორის, რომელთა ადგილსამყოფელიც უცნობია, არიან აქტივისტები ვლადიმერ კარა-მურზა, ოლეგ ორლოვი და ლილია ჩანიშევა, ასევე მოსკოვის საკრებულოს წევრი ილია იაშინი.
Politika.Kozlov-ის წყაროს ცნობით, გაცვლისთვის მომზადებული პირების სიაში შედიან ადამიანები, რომლებიც დაკავშირებული იყვნენ კრემლის კრიტიკოსის ალექსეი ნავალნის ორგანიზაციებთან, რუსეთის მოქალაქეები, რომლებიც დააპატიმრეს უკრაინის ომისა და აშშ-ის კრიტიკისთვის. სიაში შესაძლოა ასევე შევიდნენ ის პირები, რომელთა სასამართლო პროცესი ჯერ კიდევ გრძელდება.
ხელისუფლებამ "დიდი ძალისხმევა გაატარა, რომ რუსეთში არსებული ინფორმაცია ბოლო მომენტამდე საიდუმლოდ შენარჩუნებულიყო", - აღნიშნა Politika.Kozlov-ის წყარომ.
წყაროს თქმით, გაცვლა შეიძლება მოხდეს ოთხშაბათს ან ხუთშაბათს, მაგრამ არ აქვს უფრო კონკრეტული დეტალები მისი დროის შესახებ.
ასევე ოთხშაბათს, პატიმართა ფედერალური ბიუროს მონაცემთა ბაზიდან გაქრა ინფორმაცია შეერთებულ შტატებში დაპატიმრებული 4 რუსის შესახებ, მათ შორის კიბერდანაშაულის, ფულის გათეთრებისა და ელექტრონიკის კონტრაბანდის ბრალდებით.
რუსეთმა ბოლოს პატიმრები შეერთებულ შტატებთან 2022 წელს გაცვალა, როდესაც გაათავისუფლა ამერიკელი კალათბურთელი ბრიტნი გრინერი ცნობილ იარაღით მოვაჭრე ვიქტორ ბოუტისთვის, რომელიც აშშ-ში იყო დაკავებული და რომელსაც 12 წლით თავისუფლების აღკვეთა ჰქონდა მისჯილი.
გამოცემა წერს, რომ თუ ინფორმაცია დადასტურდება, მომავალი გაცვლა 2010 წლის შემდეგ ყველაზე მასშტაბური იქნება, როდესაც ვაშინგტონმა და მოსკოვმა გაცვალეს 10 რუსი საიდუმლო აგენტი, რომლებიც ფარულად ცხოვრობდნენ შეერთებულ შტატებში.
დახურვა