logo
ENG



მოძალადე, ჰომოფობიური ჯგუფები დაკავებული თანამოაზრეების მხარდამჭერ აქციას მართავენ

02 ივლ 202212:28
3 წუთის საკითხავი
clock 1214

პროროსი, მოძალადე, ჰომოფობიური ჯგუფები დაკავებული თანამოაზრეების მხარდამჭერ აქციას მართავენ. 

რუსთაველის გამზირზე, პარლამენტის წინ შეიკრიბნენ ალტ-ინფოს წევრები და მხარდამჭერები, მათ შორის, სასულიერო პირები. გამზირზე სამანქანო გზა გადაიკეტა. 

2 ივლისს, გამთენიისას მთაწმინდაზე შსს-მ ძალადობრივი და ჰომოფობიური ჯგუფის 26 წევრი დააკავა. მათ შორის ზურა მახარაძე, ბექა ვარდოსანიძე, ირაკლი მარტინენკო და მამა-შვილი ფალავანდიშვილები.

ისინი Tbilisi Pride-ის დახურულ ღონისძიებას - ფესტივალს ეწინააღმდეგებიან და მისი ჩაშლა სურთ. სწორედ ამ მიზნით იყვნენ შეკრებილები დაკავების დროსაც. 

დღეს რუსთაველზე გამოსულმა მოძალადეებმა თქვეს, რომ "თავიანთი ბიჭების გამოსვლას კიდევ ნახევარ საათს დაელოდებიან". 

გარდა ჰომოფობიური მოტივისა, სავარაუდოდ, მოძალადე ჯგუფების დღევანდელი ქმედებები 3 ივლისს დაგეგმილ პროევროპულ აქციას უკავშირდება და ხელისუფლების მიერ არის ორგანიზებული, ისევე, როგორც მიმდინარე კვირას რეგიონებში გამართულ შეხვედრებზე მომხდარი ორგანიზებული ძალადობა. 

პარლამენტის წინ შეკრებილი მოძალადეების ნაწილი ადგილზე გვიანობამდე დარჩენას გეგმავს, მათი თქმით, "პრევენციის მიზნით", რომ პრაიდის კვირეულის ღონისძიებამ რუსთაველზე არ გადმოინაცვლონ.

თუმცა, მსგავსი რამ დაგეგმილი არ არის. Tbilisi Pride-ის ხელმძღვანელებმა მსვლელობის ჩატარებაზე უარი 2021 წლის 5 ივლისის გამო თქვა. ამ დღეს დილის 09:00 საათიდან ძალადობრივი ჯგუფები, ჰომოფობიური და სხვა საფუძვლებით, ფიზიკურად სასტიკად უსწორდებოდნენ ჟურნალისტებს და რიგით მოქალაქეებს, შესაბამისად, 18:00 საათზე დანიშნული მარში აღარ ჩატარდა.

2021 წელს ძალადობა პრემიერმინისტრმა ირაკლი ღარიბაშვილმა წაახალისა და მთელი პასუხისმგებლობა ლგბტქ უფლებადამცველ ორგანიზაციას დააკისრა, პოლიცია კი ადგილზე ძალიან მცირე რაოდენობით იყო წარმოდგენილი.


close დახურვა