რუსთაველის გამზირზე, პარლამენტის შენობასთან უკრაინის მხარდამჭერი მდუმარე აქცია გაიმართა. აქცია საქართველოში მცხოვრებმა უკრაინელებმა გამართეს და მას ქართველი დევნილებიც შეუერთდნენ.
აქციის მონაწილეებმა სოლიდარობა გამოუცხადეს რუსეთის მასობრივი დაბომბვის შედეგად დაღუპულებსა და დაშავებულებს.
8 ივლისს რუსეთმა უკრაინის მიმართულებით დაახლოებით 40-მდე სხვადასხვა ტიპის რაკეტა გაუშვა. იერიშის ქვეშ მოყვა კიევი, დნიპრო, კრივოი როგი, პოკროვსკი, სლავიანსკი და კრამატორსკი. კიევში რუსეთმა ბავშვთა საავადმყოფო დაბომბა.
მასობრივი დაბომბვის შედეგად უკრაინაში 40-მდე ადამიანის დაიღუპა, მათ შორის ოთხი ბავშვია. 170-მა ადამიანმა, მათ შორის 13-მა ბავშვმა დაზიანებები მიიღო.
საერთო ჯამში დაზიანდა 100-მდე ობიექტი - ბავშვთა საავადმყოფო, საცხოვრებელი სახლები, საბავშვო ბაღები, სამშობიარო, კოლეჯი, ბიზნესცენტრი.
მსხვერპლის რაოდენობის თვალსაზრისით, 2024 წელს ეს რუსეთის ყველაზე მასშტაბური თავდასხმაა.
რუსეთის იერიში დაგმეს გაეროში. დიდი ბრიტანეთის, საფრანგეთის, ეკვადორის, სლოვენიისა და აშშ-ის მოთხოვნით, აღნიშნულ საკითხზე გაეროს უშიშროების საბჭოს სხდომა გაიმართება.
დახურვა