პატიმრების გაქცევა კლინიკიდან - შაბათის ფორმულა

შაბათის ფორმულას ექსკლუზივი. - ავერსის კლინიკიდან გაქცეული პატიმრების კადრები. მასალაში, გარდა საბადრაგო სამსახურის უმეთვალყურეოდ დარჩენილი პატიმრებისა - ჩანს არაერთი კანონდარღვევაც. სამივე პატიმარი კლინიკაში  ხელბორკილების გარეშე ჰყავთ მიყვანილი. მათ აცვიათ თასმებიანი ფეხსაცმელი და ერთ-ერთს შარვალზე ქამარიც უკეთია. კადრებში მათ გარდა არავინ ჩანს - ფაქტია, ბადრაგებმა რეაგირება იმდენად დააგვიანეს, რომ გაქცეულებიდან 2-მა ქალაქის დატოვება შეძლო. 1-ელ ნოემბერს შაბათის ფორმულა შემთხვევის ადგილზე პირველი მივიდა. როგორ გაიქცნენ პატიმრები კლინიკის ეზოდან, ვინ დატოვა ისინი უმეთვალყურეოდ და ჰყავდათ თუ არა თანამზრახველები - შაბათის ფორმულა ამ კითხვებზე პასუხის მიღებას მთელი კვირის განმავლობაში ცდილობდა. ჩვენი ინფორმაციით, პატიმრები კლინიკის გვერდითა მხარეს, ღობეზე გადახტომით, რესპუბლიკური საავადმყოფოს უკანა ეზოში აღმოჩნდნენ. იქიდან კი მთავარ ქუჩაზე გავიდნენ.