უკრაინის ვერხოვნა რადას ინფორმაციით, შალვა პაპუაშვილმა რუსლან სტეფანჩუკთან ერთად კიევის ქალაქებში სტუმრობისას განაცხადა, რომ საქართველო რუსეთს არანაირი გზით არ დაეხმარება.
„საქართველო რუსეთს არანაირი გზით არ დაეხმარება“ - რადას ცნობით, განაცხადა პაპუაშვილმა.
შალვა პაპუაშვილი უკრაინის პარლამენტის თავმჯდომარესთან ერთად კიევის რეგიონში რუსული აგრესიის შედეგად განადგურებულ ქალაქებს ესტუმრა.
რადა იუწყება, რომ პაპუაშვილმა განაცხადა, რომ საქართველოს პოზიცია ნათელია და ის უკრაინის მხარეს დგას.
„ჩვენ ცხადად გვესმის სად ვართ, რომელ მხარეს და ჩვენ კარგად გვესმის რომ ერთ მხარეს უკრაინასთანაა ევროკავშირი, ისევე როგორც მთელი სამყარო.
ჩვენთვის ძალიან მკაფიოა სად ვდგავართ 2008 წლის შემდეგ - მას შემდეგ, რაც ჩვენ იგივე სიტუაცია გვქონდა“, - რადას ინფორმაციით, განაცხადა შალვა პაპუაშვილმა.
უკრაინის პარლამენტი ასევე იუწყება, რომ საქართველოს პარლამენტმა უკრაინა დაარწმუნა, რომ დღევანდელი პირადი შეხვედრით „ყველაფერი საბოლოოდ გაირკვა“.
„ჩვენ ერთმანეთის გვერდით ვდგავართ, და ეს ყველაზე მნიშვნელოვანია“, - განაცხადა პაპუაშვილმა.
საქართველოს პარლამენტის თავმჯდომარემ, შალვა პაპუაშვილმა რადის თავმჯდომარესთან შეხვედრის შემდეგ გამართულ ბრიფინგზე, რუსლან სტეფანჩუკს მოწვევისთვის მადლობა გადაუხადა და აღნიშნა, რომ უკრაინასთან სიახლოვის გათვალისწინებით მათ არ შეეძლოთ არ სტუმრებოდნენ უკრაინას.
შეხვედრის შესახებ რუსლან სტეფანჩუკმა ცოტა ხნის წინ განაცხადა, რომ პაპუაშვილთან რუსეთისთვის სანქციების დაწესებაც განიხილა.
შალვა პაპუაშვილი საქართველოს დელეგაციას ხელმძღვანელობს, რომელიც უკრაინაში დღეს ჩავიდა. დელეგაციაში მმართველი გუნდის და ოპოზიციური პარტიების წარმომადგენლები შედიან, გარდა ნაციონალური მოძრაობისა.
ენმ-ის წევრები უკრაინაში 15 აპრილს ჩავიდნენ. კერძოდ, ქვეყანაში ჩავიდა ნიკა მელია, ეკა ხერხეულიძე და კობა ნაყოფია. მათთან ერთად არის საქართველოს მეოთხე პრეზიდენტი, გიორგი მარგველაშვილი.
დახურვა