რუსეთის საგარეო საქმეთა სამინისტროს დსთ-ს ქვეყნების მეოთხე დეპარტამენტის დირექტორის დენის გონჩარის განცხადებით, რუსეთმა შესაძლოა გადაწყვიტოს საქართველოსთან პირდაპირი ფრენების განახლება და მის მოქალაქეებთან მიმართებაში ვიზალიბერალიზაცია აამოქმედოს.
ამასთან, როგორც გონჩარმა TASS-სთან ინტერვიუში აღნიშნა, ფრენების განახლდება "თუკი აუცილებელი წინაპირობები ჩამოყალიბდება".
"რაც შეეხება საქართველოს მოქალაქეებისთვის პირდაპირი ფრენების აღდგენისა და ვიზალიბერალიზაციის პერსპექტივებს, თუ ამისათვის აუცილებელი წინაპირობები ჩამოყალიბდება - თბილისში პირობები ცნობილია - არ გამოვრიცხავთ ამ საკითხზე გადაწყვეტილების მიღებას", - თქვა გონჩარმა.
რუსი დიპლომატის განცხადებით, საქართველოში ეკონომიკური ზრდის პროგნოზი ორნიშნა ციფრამდე რუსეთიდან შემომავალი ტურიზმის, ფულადი გზავნილებისა და რუსეთთან ვაჭრობის წყალობით გაიზარდა.
რუსეთ-საქართველოს პირდაპირი ფრენების დროებითი აკრძალვა ძალაში 2019 წლის 8 ივლისიდან შევიდა. გადაწყვეტილება პრეზიდენტმა ვლადიმერ პუტინმა, 20 ივნისს თბილისში კომუნისტი დეპუტატის სერგეი გავრილოვის ვიზიტის შემდეგ მიიღო. ამავე, დღეს რუსეთის ტრანსპორტის სამინისტრომ მიიღო გადაწყვეტილება ქართული ავიაკომპანიების რუსეთში ფრენების შეჩერების შესახებ.
დახურვა