მედიის ინფორმაციით, ოდესის პორტის მახლობლად, შავ ზღვაში მყოფ სამოქალაქო სატვირთო გემ GOLDEN LEO-ზე რუსულმა ძალებმა სამი ფრთოსანი რაკეტით იერიში მიიტანეს. გვინეა-ბისაუს დროშით მცურავი და თურქეთის მფლობელობაში არსებული გემი, რომელსაც სიმინდი გადაჰქონდა, დარტყმის მომენტში საბრძოლო მოქმედებების ზონიდან გამოსვლას ცდილობდა.
გემზე 18 მეზღვაური იმყოფებოდა - სირიის, ინდოეთის და უკრაინის მოქალაქეები. მათ შორის იყო უკრაინის საზღვაო პორტების ადმინისტრაციის ლოცმანიც. თავდასხმის შედეგად გემზე ძლიერი ხანძარი გაჩნდა.
პირველადი მონაცემებით, ადგილზე 6 მეზღვაური დაიღუპა, 4 კი დაკარგულად გამოცხადდა. მაშველებმა 8 წევრის ევაკუაცია შეძლეს, რომელთაგან ორი დაშავებული იყო.
მთელი ღამის განმავლობაში მიმდინარე სამძებრო-სამაშველო ოპერაცია 20 ივლისის დილისთვის დასრულდა. უკრაინის საზღვაო პორტების ადმინისტრაციამ დაადასტურა, რომ დაკარგულად მიჩნეული 4 მეზღვაურიც დაღუპული იპოვეს. შესაბამისად, მსხვერპლთა რაოდენობა 10-მდე გაიზარდა (დაღუპულთა შორის არის უკრაინელი ლოცმანიც). დილისთვის გემზე გაჩენილი ხანძრის სრული ლიკვიდირებაც მოხერხდა.
პარალელურად, 20 ივლისის დილას ოდესის საქალაქო-სამხედრო ადმინისტრაციის ხელმძღვანელმა სერჰი ლისაკმა განაცხადა, რომ რუსეთმა ქალაქზე მორიგი სარაკეტო დარტყმა განახორციელა, რის შედეგადაც დაზიანდა ინფრასტრუქტურა.
ამავე დილას, რუსეთის თავდაცვის სამინისტრომ გავრცელებულ ცნობაში აღნიშნა, რომ ღამით ოდესის პორტში უკრაინის არმიისთვის განკუთვნილი საწვავის რეზერვუარები გაანადგურეს. სამოქალაქო გემ GOLDEN LEO-ზე თავდასხმის ფაქტზე კრემლს კომენტარი არ გაუკეთებია.
უკრაინის ინფრასტრუქტურისა და ტრანსპორტის მინისტრმა მიკოლა კალაშნიკმა და პრემიერ-მინისტრმა მომხდარი შეაფასეს, როგორც რუსეთის მიერ ჩადენილი მორიგი ომის დანაშაული. მათი განცხადებით, სამოქალაქო გემებზე შეტევით რუსეთი ძირს უთხრის შავი ზღვის უსაფრთხოებას, საერთაშორისო ნაოსნობასა და გლობალურ სასურსათო სტაბილურობას.
რუსეთის თავდაცვის უწყება ტრადიციულად ამტკიცებს, რომ ოდესის ოლქის პორტებში მათი სამიზნე მხოლოდ სამხედრო დანიშნულების ობიექტებია.
მხოლოდ ამ ზაფხულის დასაწყისიდან ოდესის ოლქში სატვირთო გემებზე განხორციელებულ თავდასხმებს ათამდე ადამიანი ემსხვერპლა. პარალელურად, უკრაინული მხარეც ხშირად ესხმის თავს შავსა და აზოვის ზღვებში რუსეთის ე.წ. "ჩრდილოვანი ფლოტის" გემებს. ამასთან, საბრძოლო მოქმედებები უკრაინის საზღვრებს გარეთაც ვრცელდება - მაგალითად, 20 ივლისის დილას დრონებით მასირებული შეტევა დაფიქსირდა უშუალოდ მოსკოვსა და მოსკოვის ოლქზეც.
დახურვა