საქართველოს ყოფილი პრეზიდენტი, მიხეილ სააკაშვილი მადლობას უხდის მეუფე ნიკოლოზს მისი შინაპატიმრობის ინიცირებისთვის, თუმცა აღნიშნავს, რომ არანაირ პატიმრობას არ იღებს და მისი ამოცანა თავისუფლებაა.
ამაზე სააკაშვილი მის facebook-ზე გავრცელებულ წერილში წერს.
"ძალიან დიდი მადლობა მეუფე ნიკოლოზს თავის ეპარქიაში ჩემს შინაპატიმრობაში გადაყვანის ინიცირებისთვის. მე არაერთხელ ვარ იქ ნამყოფი. მართლაც ჯადოსნური, სიყვარულით და ინტელექტუალური და სულიერი ენერგიით სავსე ადგილია. მაგრამ, საქმე იმაშია, რომ მე არანაირ პატიმრობას არ ვიღებ, მათ შორის შინაპატიმრობას, დაფუძნებულ უსამართლო "განაჩენებზე".
ჩემი ამოცანაა, მქონდეს საშუალება, ვიყო თავისუფალი და გადავადგილდებოდე საქართველოში, ჩვენს მოქალაქეებს გისოსებიდან და სასამართლოს შუშის მეორე მხრიდან კი არ ვუყურებდე, არამედ ხელს ვართმევდე, მხარზე ხელს გადავხვევდე, თვალებში ვუყურებდე, პირადად ვუსმენდე და ძალღონე არ დავიშურო მათი ამ უბედური მდგომარეობის გადასალახად.
მე ჩამოვედი იმიტომ, რომ მომენატრა ჩვენს ხალხთან ასეთი ურთიერთობა და იმედია, ჩვენს ხალხსა და ჩემს შორის გისოსებს ერთობლივი ძალით გავწევთ გვერდზე და ბადრაგები ვეღარ გაგვყოფენ მე და ჩვენს თანამოქალაქეებს.
ივანიშვილს კი მინდა ვუთხრა, უნდა მიიღოს ორი რეალობა - ერთი, რომ უკვე საქართველოში ვარ და მეორე, რომ დიდხანს გისოსებში ვერ გამაჩერებს და თუ მომკლავს, ეგ დაასრულებს. იფიქრე ამ სიტუაციის ცივილიზებულ, მშვიდობიან და ყველასათვის მაქსიმალურად უმტკივნეულოდ გადაწყვეტაზე", - წერს სააკაშვილი.
მეუფე ნიკოლოზი სახელმწიფოს ყოფილი პრეზიდენტის, მიხეილ სააკაშვილის მის ეპარქიაში გადაყვანას სთავაზობს. მეუფეს მიაჩნია, რომ ეს სიტუაციიდან გამოსავალია.
მიხეილ სააკაშვილი გორის ჰოსპიტლიდან რუსთავის ციხეში 30 დეკემბერს, გვიან ღამით გადაყვანეს.
დახურვა