"ქართული მარშის" ლიდერის სანდრო ბრეგაძის მიერ სახალხო დამცველზე ზემოქმედების ფაქტზე შინაგან საქმეთა სამინისტრომ გამოძიება დაიწყო, - ამის შესახებ ინფორმაციას უწყება ავრცელებს.
"თბილისის პოლიციის დეპარტამენტის საგამოძიებო სამმართველომ 12 ნოემბერს მოძრაობა "ქართული მარშის" ლიდერის - ალექსანდრე (სანდრო) ბრეგაძის მიერ სახალხო დამცველის ოფისში განხორციელებულ ქმედებებთან დაკავშირებით გამოძიება დაიწყო. გამოძიება სისხლის სამართლის კოდექსის 352-ე მუხლის პირველი ნაწილით მიმდინარეობს, რაც სახალხო დამცველის სამსახურებრივი საქმიანობისთვის ხელის შეშლის მიზნით მასზე ზემოქმედებას გულისხმობს", - ნათქვამია ინფორმაციაში.
შეგახსენებთ, რომ "ქართულმა მარშმა" გუშინ ომბუდსმენის აპარატის ოფისთან აქცია გამართა. ბრეგაძე სახალხო დამცველისგან ბოდიშის მოხდას მოითხოვდა იმის გამო, რომ ნინო ლომჯარიამ მათ ძალადობრივი ჯგუფები უწოდა.
დახურვა