NATO-ს გენერალური მდივანი იენს სტოლტენბერგი ამბობს, რომ "პუტინის მიერ განხორციელებული ანექსიის მცდელობა, ნაწილობრივი მობილიზაცია და უგუნური ბირთვული რიტორიკა აჩვენებს, რომ ომი გეგმის მიხედვით არ მიდის".
სტოლტენბერგის თქმით, რუსეთმა იცის, რომ ბირთვულ ომში გამარჯვება შეუძლებელია. მისივე თქმით, ალიანსი ფხიზლადაა და ყურადღებით აკვირდება რუსეთის ბირთვულ ძალებს.
"უკრაინა აგრძელებს მნიშვნელოვან წინსვლას მაშინ, როდესაც რუსეთი სულ უფრო მეტად ირჩევს საშინელ, განურჩეველ დარტყმებს სამოქალაქო პირებსა და კრიტიკულ ინფრასტრუქტურაზე. პრეზიდენტი პუტინი წარუმატებლობას განიცდის უკრაინაში. მის მიერ განხორციელებული ანექსიის მცდელობა და ნაწილობრივი მობილიზაცია, ასევე უგუნური ბირთვული რიტორიკა წარმოადგენს ყველაზე მნიშვნელოვან ესკალაციას ომის დაწყების შემდეგ. ეს აჩვენებს, რომ ომი გეგმის მიხედვით არ მიდის. NATO არ არის კონფლიქტის მხარე, თუმცა ჩვენი მხარდაჭერა გადამწყვეტ როლს თამაშობს.
ხუთშაბათს გაიმართება ბირთვული დაგეგმარების ჯგუფის რეგულარული შეხვედრა, რომელსაც მე ვუხელმძღვანელებ. NATO-ს ბირთვული შეკავების ფუნდამენტური ამოცანა ყოველთვის იყო მშვიდობის შენარჩუნება და აგრესიის პრევენცია. პრეზიდენტ პუტინის ფარული ბირთვული მუქარა საშიში და უპასუხისმგებლოა. რუსეთმა იცის, რომ ბირთვულ ომში გამარჯვება შეუძლებელია და ეს არასდროს უნდა მოხდეს. ჩვენ ყურადღებით ვაკვირდებით რუსეთის ბირთვულ ძალებს. რუსეთის პოზიციებში რაიმე ცვლილება არ გვინახავს, მაგრამ ფხიზლად ვართ
NATO უკრაინის გვერდაა და ასე იქნება, ვიდრე საჭიროა. პუტინმა დაიწყო ომი და მანვე უნდა დაასრულოს უკრაინიდან რუსული ძალების გაყვანით. ლუკაშენკომ უნდა შეწყვიტოს ბელარუსის თანამონაწილეობა ამ არალეგალურ კონფლიქტში", - თქვა სტოლტენბერგმა.
დახურვა