სამოქალაქო აქტივისტის ირაკლი ფავლენიშვილის ინფორმაციით, ბიძინა ივანიშვილის ბიზნეს ცენტრთან, პოლიციასა და აქციის მონაწილეებს შორის დაძაბულობის დროს 2 აქტივისტი დააკავეს.
"ორი ადამიანი არის დაკავებული, მათ შორის ერთი აქტივისტი, არის გიორგი რურუაა და მეორე ბათუმელი აქტივისტია. [ისინი დააკავეს ] როდესაც პოლიცია გვაწვებოდა ყოვლად უმიზეზოდ, არაფერი კანონის საწინააღმდეგო ჩვენ არ ჩაგვიდენია, უბრალოდ პოლიციას სურს რომ გადაგვჯეგოს, ძალით მოგვაწვეს და ამ დროს ადამიანები როცა წინა რიგში იყვნენ გაიტაცეს", - ამბობს ირაკლი ფავლენიშვილი.
ფორმულა დეტალებს შსს-ში არკვევს.
აქცია უკვე დასრულებულია. აქტივისტები რუსთავის ციხისკენ მიხეილ სააკაშვილის გასამხნევებლად გაემართნენ.
ივანიშვილის ბიზნეს ცენტრთან აქცია დღეს დაფუძნებულმა მოძრაობამ მიშას თავისუფლებისთვის გამართა.
საქართველოს ყოფილი პრეზიდენტი, მიხეილ სააკაშვილი 1-ელ ოქტომბერს, თბილისში დააკავეს. სააკაშვილმა შიმშილობა დაკავების შემდეგ დაიწყო და მე-16 დღეა შიმშილობს.
როგორც ცნობილია, სააკაშვილი საქართველოში დაკავებამდე ოთხი დღით ადრე ჩამოვიდა და რამდენიმე ქალაქში იმყოფებოდა.
დახურვა