შრომის ინსპექციის სამსახურის უფროსის ბექა ფერაძის ინფორმაციით, სახლებისა და სხვა სივრცეების ღონისძიებისთვის გაქირავება იკრძალება. ამის შესახებ მან საზოგადოებრივ მაუწყებელს უთხრა.
მისი თქმით, ცვლილებების თანახმად, ფართის იჯარით გაცემისას გამქირავებელი ვალდებული იქნება, დამქირავებელს ხელშეკრულებაში ჩაუდოს პირობა, რომ აღნიშნული ფართის გამოყენება არ უნდა მოხდეს სოციალური ღონისძიების გამართვის მიზნით.
მისივე თქმით, მსგავსი ხელშეკრულების გაფორმების შემდეგ, თუ გამქირავებლისთვის ცნობილი გახდება, რომ დამქირავებელი ფართს სოციალური ღონისძიების გასამართად იყენებს, ის ვალდებული იქნება, ამის შესახებ შრომის ინსპექციას აცნობოს, წინააღმდეგ შემთხვევაში, გამქირავებელი 10 000 ლარით დაჯარიმდება, კანონდარღვევის გამეორების შემთხვევაში კი, მის წინააღმდეგ სისხლის სამართლის საქმე აღიძვრება.
ტელეკომპანიის ინფორმაციით, კითხვაზე, რა მოხდება იმ შემთხვევაში, თუ გამქირავებელი განაცხადებს, რომ მან იჯარის ხელშეკრულებაში ჩადო სოციალური ღონისძიების აკრძალვის პირობა, თუმცა დამქირავებელმა ეს დათქმა არ შეასრულა, ბექა ფერაძემ უპასუხა, რომ შეისწავლიან, იყო თუ არა ინფორმირებული მფლობელი ფართით სარგებლობის რეალური მიზნების შესახებ. გარდა ამისა, მისივე თქმით, მსგავს არგუმენტს იგივე ფართის მეორედ და მესამედ გაქირავების შემთხვევაში საფუძველი ვერ ექნება და, შესაბამისად, "მფლობელებისთვის სანქციებისგან თავის დაღწევის ეს მეთოდი ვერ იმუშავებს".
ფერაძის თქმითვე, ბოლო პერიოდში გახშირდა შემთხვევები, როდესაც მფლობელები ფართებს სოციალური ღონისძიებების გამართვის მიზნით აქირავებენ, დარღვევის აღმოჩენის შემთხვევაში კი ჯარიმდება მოიჯარე ფიზიკური პირი - 2 ათასი ლარით, რაც ხალხმრავალი ქორწილების, დაბადების დღეებისა თუ ქელეხების მოწყობის პრევენციას სათანადოდ ვერ ახდენს. მისი განცხადებით, ახალი წესები, სავარაუდოდ, უახლოეს დღეებში ამოქმედდება.
როგორც შრომის ინსპექციის სამსახურში განმარტავენ, ბოლო ერთი კვირის განმავლობაში არანებადართული ეკონომიკური საქმიანობის 20-მდე შემთხვევა გამოვლინდა. ფერაძის თქმით, მათი უმრავლესობა სოციალურ ღონისძიებებს შეეხებოდა.
"ბოლო ერთი კვირის განმავლობაში, დაახლოებით 20-მდე შემთხვევა გამოვლინდა არანებადართული ეკონომიკური საქმიანობის და უმრავლესობა შეეხებოდა სოციალურ ღონისძიებას ისევე როგორც ღამის კლუბების ორგანიზებას. ჩვენ ვმუშაობთ სხვადასხვა მექანიზმებზე, რომ კიდევ უფრო გამკაცრდეს კონტროლი, რათა თავი არ აარიდოს რომელიმე ბიზნეს სუბიექტმა ან მოქალაქემ რეკომენდაციებს და ამით საფრთხე არ შეუქმნას ჩვენი ქვეყნის თითოეულ მოქალაქეს, ისევე როგორც ჩვენი ქვეყნის ეკონომიკურ მდგრადობას", - აცხადებს ფერაძე.
დახურვა