ფინანსთა მინისტრმა ლაშა ხუციშვილმა მე-9 კლასის ისტორიის სახელმძღვანელოსთან დაკავშირებით დასმული კითხვის პასუხად თქვა, რომ მისთვის გაურკვეველია "აჟიოტაჟის ატეხვა". მთავრობის სხდომის შემდეგ გამართულ ბრიფინგზე მინისტრმა თქვა, რომ წიგნებში ფაქტებზეა საუბარი და იქ შეფასება ვერ დაინახა.
"წიგნთან დაკავშირებით მე რა ინფორმაციაც მივიღე ამ დღეების განმავლობაში და რაც წავიკითხე, მხოლოდ ფაქტობრივი გარემოებებია და არ არის მოყვანილი გარკვეულწილად შეფასებები.
თქვენ ახსენეთ ქება- დიდება და იქ მე ვნახე უბრალოდ ბიოგრაფები ადამიანების, რომლებიც იყვნენ საქართველოს პირველი პირები წლების განმავლობაში და შესაბამისად, გაურკვეველია, რაზე ხდება ამ აჟიოტაჟის ატეხვა, როდესაც მხოლოდ ფაქტობრივ გარემოებებზეა საუბარი და ვერანაირი შეფასებები იქ ვერ ვნახე", - ამბობს მინისტრი.
5 დეკემბერს დროას ლიდერმა ელენე ხოშტარიამ საკუთარი ფეისბუქგვერდით გაავრცელა ფოტო ერთ-ერთი სასკოლო სახელმძღვანელოდან, რომელშიც მისი თქმით, ბიძინა ივანიშვილის ადიდებენ.
"ამოიღეთ პროპაგანდისტული წიგნი პროგრამიდან!" - ამ სლოგანით პარტია პარტია დროამ "დროამ" საპროტესტო აქციების დაწყება დაანონსა. პირველი შეკრება განათლების სამინისტროსთან 15:00 საათზე დაგეგმა.
რა წერია მე-9 კლასის ისტორიის სახელმძღვანელოში?
განათლების სამინისტროს გრიფირება მე-9 კლასის ისტორიის სახელმძღვანელოს ორ წიგნს აქვს. საჯარო სკოლებს სურვილისამებრ შეუძლიათ მათგან ერთის არჩევა და სწავლება.
სახელმძღვანელოში თანამედროვე ისტორიიდან, ნაციონალური მოძრაობის მმართველობაზე და ბიძინა ივანიშვილის შესახებ ჩანაწერებმა საზოგადოების ნაწილის კრიტიკა გამოიწვია.
ერთ-ერთი მაგალითია გამომცემლობა დიოგენეს მე-9 კლასის ისტორიის წიგნიც, რომელსაც განათლების სამინისტროსგან გრიფი 2020 წელს მიენიჭა. იქ ივანიშვილი "ქმელმოწმედად" და "მეცენატად" არის მოხსენიებული.
"[2012 წელს] მთავრობის მეთაური, პრემიერ-მინისტრი ქართული ოცნების დამფუძნებელი, ცნობილი ქველმოქმედი და მეცენატი, ბიძინა ივანიშვილი გახდა. ხელისუფლების ცვლილების მიუხედავად, საქართველოს ევროპული კურსი არ შეცვლილა და პირიქით, ინტეგრაცია კიდევ უფრო გაღრმავდა (გვერდი 410)", - ვკითხულობთ მე-9 კლასის ისტორიის სახელმძღვანელოში.
წიგნში საუბარია "ვარდების რევოლუციასა" და ნაციონალური მოძრაობის მმართველობაზე. კერძოდ, ნათქვამია, რომ იმ პერიოდში მთავრობამ დაამარცხა კორუფცია, გატარდა რეფორმები. ამასთან, საუბარია გადაცდომებზეც, რომ დაიწყო "გაურკვეველი დაჭერები" და, რომ ადამიანთა უფლებები ხშირად ირღვეოდა.
"2004 წლის იანვრიდან საქართველოს პრეზიდენტად საქართველოს მოსახლეობამ მიხეილ სააკაშვილი აირჩია. ახალმა მთავრობამ მოახერხა კორუფციის დაძლევა. თითქმის ყველა სფეროში (პოლიციაში, სასამართლოში, განათლების სფეროში და სხვაგან) რეფორმები გატარდა. კრიმინალური სამყაროს ავტორიტეტებს ძლიერი დარტყმა მიაყენეს. კორუფციისა და კონტრაბანდასთან ბრძოლის მოტივით დაიხურა ერგნეთის ბაზრობა, რამაც ქართულ-ოსური ურთიერთობების განვითარება შეაფერხა.
იყო გადაცდომებიც - კორუფციასთან წარმატებულ ბრძოლასთან ერთად დაიწყო გაურკვეველი დაჭერები, კრიმინალთან ბრძოლის საბაბით რამდენიმე მკვლელობა მოხდა. თუმცა შინაგან საქმეთა სამინისტროს მაღალჩინოსნები არ დასჯილან, გაურკვეველ ვითარებაში გარდაიცვალა პრემიერმინისტრი, ზურაბ ჟვანია. სასამართლოს საქმეები 99%-ს პროკურატურა იგებდა. ადამიანთა უფლებები ხშირად ირღვეოდა. დაიწყო უკმაყოფილო მოსახლეობის საპროტესტო გამოსვლები. ამ აქციებში მონაწილე აქტიურ პირებს ხშირად უსაფუძვლოდ აპატიმრებდნენ და ციხეში სვამდნენ. ციხეებში კი განუკითხაობა სუფევდა, რაც პატიმრების ფსიქოლოგიურ და ფიზიკურ შეურაცხყოფაში გამოიხატებოდა", - ვკითხულობთ სახელმძღვანელოში.
დიოგენეს მიერ გამოცემულ წიგნში საუბარია 2008 წლის აგვისტოს ომზეც, რომ 6-7 აგვისტოს "ოსურმა შეიარაღებულმა ფორმირებებმა" ცხინვალის მიმდებარე ქართულ სოფლებს ცეცხლი გაუხსნეს.
"2008 წლის ივნის-ივლისში მკვეთრად მოიმატა შეიარაღებულმა პროვოკაციებმა ცხინვალის რეგიონში. ქართული სოფლებისთვის ცეცხლის გახსნა, გზების დანაღმვა, მშვიდობიანი მოსახლეობის გატაცება ყოველდღიურ მოვლენად იქცა. 2008 წლის 6-7 აგვისტოს ოსურმა შეიარაღებულმა ფორმირებებმა ცხინვალის მიმდებარე ქართულ სოფლებს ინტენსიური ცეცხლი გაუხსნეს.
საქართველოს პრეზიდენტმა ადგილობრივი მოსახლეობის დასაცავად ცხინვალის რეგიონში შეიარაღებული ძალების შეყვანის ბრძანება გასცა, რასაც რუსეთის ფედერაციამ პირდაპირი სამხედრო აგრესიით უპასუხა. 2008 წლის 8-10 აგვისტოს რუსეთმა სამხრეთ ოსეთსა და აფხაზეთში ათასობით ერთეული სამხედრო ტექნიკა და ათიათასობით სამხედრო ძალა შემოიყვანა. მძიმე ბრძოლების შემდეგ, ძალების აშკარა უთანასწორობის გამო, საქართველოს ხელისუფლებამ კონფლიქტის ზონიდან ჯარები გამოიყვანა", - წერია წიგნში.
ამავე სახელმძღვანელოში მე-9 კლასელებისთვის დასისკუსიო თემად მოცემულია შემდეგი კითხვა: "შენი აზრით, დაუშვა თუ არა შეცდომა საქართველოს პრეზიდენტმა, როდესაც ოსური შეიარაღებული ფორმირებების მიერ ქართული სოფლების მიმართულებით სროლას რეგიონში სამხედრო ნაწილების შეყვანით უპასუხა?"
დახურვა