ქუთაისის საერთაშორისო აეროპორტი დროებით მუშაობას წყვეტს. წინასწარი ინფორმაციით, აეროპორტი 11 ივლისის 07:00 საათამდე არ იმუშავებს.
აეროპორტის მუშაობის შეფერხების მიზეზი დასავლეთ საქართველოში უამინდობა, ძლიერი წვიმაა. უხვი ნალექის გამო შეფერხდა აეროპორტის სამგზავრო ტერმინალის მუშაობა.
"ამ ეტაპზე მიღებულია სიფრთხილის ყველანაირი ზომები. ქუთაისის საერთაშორისო აეროპორტში დაგეგმილი ფრენები თბილისის საერთაშორისო აეროპორტშია გადამისამართებული. ამასთან, გამოცხადებულია ე.წ. ნოტამი, რაც გულისხმობს საერთაშორისო საავიაციო არხების საშუალებით შესაბამისი ინფორმაციის გავრცელებას. აეროპორტის ტერიტორიაზე აქტიურად მუშაობს ექსპერტთა ჯგუფი - ადგილზე სწავლობს არსებულ ვითარებას. საქართველოს აეროპორტების გაერთიანება სრულადაა პროცესში ჩართული და ოპერატიულად მოახდენს მოსახლეობის ინფორმირებას", - წერია ქუთაისის აეროპორტის მიერ გავრცელებულ ინფორმაციაში.
მანამდე გახდა ცნობილი, რომ ძლიერი წვიმის გამო ქუთაისში, კოპიტნარის აეროპორტი დაიტბორა და ჭერის ფრაგმენტები ჩამოინგრა.
დახურვა