შინაგან საქმეთა სამინისტროს თანამშრომლებმა განსაკუთრებით დიდი ოდენობით ნარკოტიკული საშუალების უკანონო შეძენა-შენახვისა და საქართველოში უკანონოდ შემოტანის ბრალდებით ორი პირი დააკავეს.
შსს-ის ინფორმაციით, სამართალდამცველებმა ჟ.ი თბილისის საერთაშორისო აეროპორტში იმ დროს დააკავეს, როდესაც ის პარიზი-თბილისი რეისით ჩამოფრინდა. პოლიციამ მისი პირადი ჩხრეკისას "ბუპრენორფინის" შემცველი ნარკოტიკული საშუალება "სუბოტექსის" 330 აბი ამოიღო.
გამოძიებით დადგინდა, რომ ბრალდებულმა ბ.ლ-მ აღნიშნული ნარკოტიკული საშუალება ჟ.ი-ს დახმარებით საქართველოში უკანონოდ შემოიტანა. პოლიციამ ბ.ლ მოსამართლის განჩინების საფუძველზე, თბილისში დააკავა.
მომხდარზე გამოძიება სისხლის სამართლის კოდექსის 260-ე მუხლის მე-3 ნაწილის „ბ“ ქვეპუნქტით, მე-6 ნაწილის „ა“ ქვეპუნქტით და 262-ე მუხლის მე-2 ნაწილის „ბ“ ქვეპუნქტით და მე-4 ნაწილის „ა“ ქვეპუნქტით მიმდინარეობს, რაც წინასწარი შეთანხმებით ჯგუფის მიერ განსაკუთრებით დიდი ოდენობით ნარკოტიკული საშუალების უკანონო შეძენა-შენახვასა და საქართველოში უკანონოდ შემოტანას გულისხმობს.
დანაშაულის დამტკიცების შემთხვევაში ბრალდებულებს 8-20 წლამდე, ან უვადოდ თავისუფლების აღკვეთა ემუქრებათ.
დახურვა