წარმომადგენელთა პალატა: რუსეთის უგუნური შეჭრა საქართველოში 2008 წელსაც და ახლაც მიუღებელია

ამერიკის შეერთებული შტატების წარმომადგენელთა პალატის საგარეო საქმეთა კომიტეტი 2008 წლის აგვისტოს ომს ეხმაურება და განცხადებას ავრცელებს.

როგორც კომიტეტის თავმჯდომარის ელიოტ ენგელისა და კონგრესმენ მაიკლ მაკკაულის ერთობლივ განცხადებაშია ნათქვამი, რუსეთის უგუნური ქმედება ახლაც ისეთივე მიუღებელია, როგორც 12 წლის იყო.

„რუსეთის უგუნური შეჭრიდან 12 წლის შემდეგ, სამხრეთ ოსეთისა და აფხაზეთის ოკუპაცია, ასევე საქართველოს საშინაო პოლიტიკაში ჩარევა, ისევ გრძელდება. ეს ქმედება მიუღებელი იყო 2008 წელს და მიუღებელია ახლაც. ქართველმა ხალხმა უფრო დემოკრატიული ქვეყნის ასაშენებლად მსხვერპლი გაიღო და საქართველომ დაამტკიცა, რომ ამერიკის და ნატო-ს მნიშვნელოვანი მხარდამჭერია, განსაკუთრებით ავღანეთში. ჩვენ უნდა გავაგრძელოთ საქართველოს, უკრაინისა და ყველა პარტნიორის მხარდაჭერა, ვინც პუტინის მტრული ქმედებების გამო იტანჯება“, - ნათქვამია განცხადებაში.

2008 წლის რუსეთ-საქართველოს ომიდან 12 წელი გავიდა. რუსული საოკუპაციო ძალების ინტერვენციების შედეგად, დაიღუპა საქართველოს 224 სამოქალაქო პირი, თავდაცვის სამინისტროს 170 მოსამსახურე და შინაგან საქმეთა სამინისტროს 14 თანამშრომელი. 150 ათას ადამიანს საკუთარი საცხოვრებლის დატოვება მოუწია. მათგან ბევრი დღესაც დევნილია.