კულტურის მინისტრი თეა წულუკიანი უკრაინის მმართველი პარტიის ფრაქციის თავმჯდომარე დავით არახამიას განცხადებას ეხმაურება და ამბობს, რომ "საქართველოს არ სჭირდება დახმარება იმაში, რომ ქვეყანაში ატყდეს ომი და იყოს დესტაბილიზაცია".
წულუკიანის თქმით, ხელისუფლება პირიქით, სხვა სტილით მართავს ქვეყანას და "ყველაფერს აკეთებს, ხანდახან შეუძლებელსაც, რომ ქვეყანაში იყოს მშვიდობა"
"ნამდვილად არ გვჭირდება დახმარება იმაში, რომ ამ ქვეყანაში ატყდეს ომი. ჩვენ ნამდვილად არ გვჭირდება დახმარება იმაში, რომ ქვეყანაში იყოს დესტაბილიზაცია და იღუპებოდნენ ადამიანები და პირიქით, სულ სხვა სტილით ვმართავთ ქვეყანას. ჩვენ ყველაფერს ვაკეთებთ, ხანდახან მთავრობა და პარლამენტი აკეთებს შეუძლებელსაც კი იმისთვის, რომ ქვეყანაში იყოს მშვიდობა, რომ ბავშვები დილით კარგ ხასიათზე მიდიოდნენ ბაღებსა და სკოლებში და ზაფხულში ისვენებდნენ მშვიდობიან გარემოში. მინდა უკრაინას ვუსურვო ძალიან მალე მშვიდობის დამყარება, გამთლიანება მის ტერიტორიებს და სუვერენიტეტს გაძლიერება და ბატონ არახამიას ვურჩიო, რომ სწორედ ამ საქმით დაკავდეს", - ამბობს წულუკიანი.
დავით არახამიამ 7 სექტემბერს ვიდეო გაავრცელა, სადაც უკრაინის მხრიდან 12 ქართველის სანქცირების საკითხს გამოეხმაურა და თქვა, რომ "სანქციების პაკეტში, ჯერჯერობით, მისი [ივანიშვილის] გარემოცვის წევრები არ არიან.
"როგორც შეგპირდი ბატონო ივანიშვილო, დიდი მოკითხვა უკრაინიდან. მუშაობას ვაგრძელებთ. ძვირფასო ქართველებო, სამწუხაროდ, თუ თქვენი ძალებით ვერ ახერხებთ დეოლიგარქიზაციას, ჩვენ დაგეხმარებით", - თქვა არახამიამ.
დახურვა