ხოშტარია: დღეს ქართულმა ოცნებამ გადაწყვიტა, განაჩენი გამოუტანოს საქართველოს დემოკრატიას

სამოქალაქო აქტივისტმა და პოლიტიკოსმა ელენე ხოშტარიამ ენმ-ის ოფისში გამართულ ბრიფინგზე განაცხადა, რომ ნიკა მელიასთვის პატიმრობის შეფარდებით ქართულმა ოცნებამ გადაწყვიტა, განაჩენი გამოუტანოს საქართველოს დემოკრატიას.

ხოშტარიას თქმით, ქვეყნის ბედს წყვეტს ხალხი და არა ქართული ოცნების მონა პროკურორები ან მოსამართლეები.

"2019 წელს ჩვენ ვიხილეთ ქართული ოცნების თავხედობა, როდესაც მათ შეურაცხყოფა მიაყენეს საქართველოს აბსოლუტურად ყველა მოქალაქეს. თუმცა იმავე დროს ვიხილეთ ერთ მუშტად შეკრული საქართველო, რომელმაც უთხრა, რომ საქართველოს მოქალაქე არ დაისვამს თავზე გავრილოვს და გავრილოვი გავაბუნძულეთ იქიდან. ჩვენ ამაყი ერი ვიყავით ერთი წლის წინ. დღეს ქართულმა ოცნებამ გადაწყვიტა, განაჩენი გამოუტანოს საქართველოს დემოკრატიას, თავისუფლებას და მომავალს. ზუსტად ასევე დღეს ჩვენ ვიძახით, რომ ჩვენ ამას არ ვემორჩილებით სიმშვიდით, სიმტკიცითა და ერთიანობით. არაფერი მოხდება, მშვიდად ვიდგებით ერთად და გავისტუმრებთ ამ ხელისუფლებას", - განაცხადა ხოშტარიამ.

თბილისის საქალაქო სასამართლოს მოსამართლემ, ნინო ჩახნაშვილმა ნიკა მელიას პატიმრობა შეუფარდა. გადაწყვეტილება მან რამდენიმე წუთის წინ გამოაცხადა. 

მოსამართლემ პროკურატურის შუამდგომლობა გაითვალისწინა და აღკვეთის ღონისძიება - გირაო შეცვალა. ბრალდება ენმ-ის თავმჯდომარისთვის სწორედ პატიმრობის შეფარდებას ითხოვდა.

პროკურატურა ნიკა მელიას 20-21 ივნისის საქმეზე ჯგუფური ძალადობის ხელმძღვანელობას და მასში მონაწილეობას ედავება. 2019 წლის 27 ივნისის განჩინებით, მელიას აღკვეთის ღონისძიების სახით შეეფარდა გირაო 30 000 ლარი და დამატებით შემზღუდავი ღონისძიებები, მათ შორის, ელექტრონული მონიტორინგი.

1-ლი ნოემბრის აქციაზე ნიკა მელიამ სამაჯური მოიხსნა და ხალხში გადააგდო. თბილისის საქალაქო სასამართლოს 2020 წლის 3 ნოემბრის გადაწყვეტილებით, ნიკა მელიას მიმართ მანამდე გამოყენებული აღკვეთის ღონისძიება - გირაო გამკაცრდა და გაიზარდა 40 000 (ორმოცი ათასი) ლარით, კერძოდ, 70 000 (სამოცდაათი ათასი) ლარამდე.

მელიამ სწორედ ეს თანხა არ გადაიხადა ვინაიდან, მისი თქმით, "როცა ქვეყანაში პროკურატურა შოთაძე-ფარცხალაძის საკუთრებაა, როცა სასამართლო მურუსიძე-ჩინჩალაძის საკუთრებაა და პარლამენტი კობახიძე-გავრილოვის სახეს წარმოადგენს და ეს ყველა ე.წ. ინსტიტუტი ბიძინა ივანიშვილის ჯიბეშია, არანაირი მორალური უფლება არ აქვს, ამ სიყალბეში მონაწილეობა მიიღოს".

საქმეს კი მოსამართლე ნინო ჩახნაშვილმა განიხილა, რომელმაც ბოლო რამდენიმე წლის განმავლობაში არაერთ პოლიტიკურ საქმეზე მიიღო ხელისუფლებისთვის მისაღები გადაწყვეტილება.

2019 წლის ივლისში 20 ივნისის ღამის საქმეზე ჩახნაშვილმს არც ერთი პირი, მათ შორის არც მაკო გომური, დაზარალებულად არ ცნო და ეს გადაწყვეტილება პროცესის გამართვის გარეშე, ზეპირი მსჯელობით მიიღო. ამავე წელს, მთავარი არხის მეწილის, გიორგი რურუას მიმართ აღკვეთის ღონისძიების სახით შეფარდებული პატიმრობა მოსამართლე ჩახნაშვილმა ძალაში დატოვა.

ასევე, 2020 წლის აპრილში ნინო ჩახნაშვილმა მიხეილ სააკაშვილის საპრეზიდენტო ბიბლიოთეკაში გაჩენილი ხანძრის გამო ბრალდებულ ბადრი ქათამაძეს ორ თვიანი პატიმრობა მიუსაჯა. თელავის სასამართლოში, ერთწლიანი სამოსამართლეო გამოცდილების მიღებამდე, ჩახნაშვილი 2016-2018 წლებში იყო თბილისის საქალაქო სასამართლოს საგამოძიებო და წინასასამართლო სხდომის კოლეგიის სამდივნოს მოსამართლის თანაშემწე.