„ჩემი კონკურენტი არის ეს სისტემა და არა ნოდარ ტურძელაძის „ვაკელობა”, ცნობადობა, ან ადამიანური თვისებები”, - ამის შესახებ ვაკის საარჩევნო ოლქში ოპოზიციის მაჟორიტარობის კანდიდატი ელენე ხოშტარია Facebook-ის საკუთარ გვერდზე წერს.
ხოშტარია მმართველი გუნდის ლიდერს აკრიტიკებს და აცხადებს, რომ იმ პირობებში, როდესაც ბიძინა ივანიშვილი საკუთარი გუნდის წევრებსაც ინსტრუმენტებად აღიქვამს და ქვეყნის გეზს საფრთხეს უქმნის, მთავრობის მსახურება დიდი შეცდომაა. მისი თქმით, სამწუხაროა, რომ ტურძელაძე ამ გარემოებებს „არ იაზრებს“.
„ნოდარ ტურძელაძე წინა არჩევნების შემდეგ გავიცანი. გამგებელი იყო მაშინაც. დავურეკე, შეხვედრა ვთხოვე და ვუთხარი, რომ ბევრი პრობლემა და საკითხია ვაკეში, რაზეც თანამშრომლობა მერჩივნა, ვიდრე უბრალოდ ყვირილი. ძალიან ღირსეული და კარგი ურთიერთობა გვქონდა. ვერაფერს ცუდს მასზე ადამიანურად ვერ ვიტყვი და არც მინდა.
პრობლემა სულ სხვა რამეშია. ბიძინა ივანიშვილი, რომელიც თავის გუნდის წევრებსაც კი პატივს არ სცემს, თავის ინსტრუმენტებად აღიქვამს. და დღეს ეს მთავრობა და ბიძინა ივანიშვილი უნდა შევცვალოთ. ის უკვე იქცა ადამიანური ტრაგედიების წყაროდ, ტყუილა დაპატიმრებული ხალხი და მათი ოჯახები, თავგასული პოლიციის მსხვერპლები, კორუფციის მსხვერპლები, კრიმინალის მსხვერპლები. საფრთხეშია ქვეყნის გეზი, წარმოუდგენელია, რომ ბევრი, ბევრი მსხვერპლის და წვალების შემდეგ რუსეთისკენ ტრიალდება ქვეყანა. ამ პირობებში, ამ მთავრობის მსახურება ძალიან დიდი შეცდომაა, რომელსაც არ ვიცი თავად ტურძელაძე იაზრებს, თუ არა (როგორც ჩანს არა).
ამიტომ ჩემი კონკურენტი არის ეს სისტემა და არა ნოდარ ტურძელაძის "ვაკელობა", ცნობადობა ან ადამიანური თვისებები. უბრალოდ, სამწუხაროდ, დღეს მან ამ სისტემის მსახურება გადაწყვიტა.
მიუხედავად ბევრი სიმწვავისა, მე და ქართული ოცნების მოწინააღმდეგეები, ჩემი აზრით, უნდა ვეცადოთ და ღირსეულად გავიაროთ ეს კამპანია. პოლიტიკურად დამარცხება ადამიანურ განადგურებას არ უნდა ნიშნავდეს. მათ შორის მაგიტომ მინდა მოგება, რომ ამის მაგალითები შევქმნათ”, - წერს ხოშტარია.
შეგახსენებთ, ვაკეში ქართული ოცნების კანდიდატი ვაკის რაიონის გამგებელი, ნოდარ ტურძელაძეა. აღნიშნულ ოლქში ოპოზიციიდან კენჭს ელენე ხოშტარია იყრის. Edison Research-ის კვლევით, ხოშტარიას ხმას 46% აძლევს, მმართველი გუნდის კანდიდატს - 31%.
დახურვა