logo
ENG



ჯაღმაიძე მეუფე იაკობზე: პანსიონში, შესაძლოა, პირადი თვისებებიდან გამომდინარე დაინიშნა

14 ივნ 202118:40
3 წუთის საკითხავი
clock 800
ჯაღმაიძე მეუფე იაკობზე: პანსიონში, შესაძლოა, პირადი თვისებებიდან გამომდინარე დაინიშნა
ფორმულა

საპატრიარქოს პრესსამსახურის ხელმძღვანელი ანდრია ჯაღმაიძე ამბობს, რომ მეუფე იაკობი ნინოწმინდის პანსიონში, შესაძლოა, მისი პირადი თვისებებიდან გამომდინარე დაენიშნათ.

ანდრია ჯაღმაიძის თქმით, მიტროპოლიტ იაკობს აქვს სტუდენტებთან მუშაობის გამოცდილებაც და პრინციპულობაც.

„მეუფე იაკობს გამცოდილება აქვს სტუდენტებთან ურთიერთობის, შეუძლია პრინციპულად საკითხები დააყენოს და დაიცვას. შესაძლოა, მისი ბევრი პირადი თვისებებიდან გამომდინარე. როგორც ჩანს, არის ზოგიერთი დაფარული თვისება, რომელიც ასე არ ჩანს, ყოველდღიურად. ვნახოთ, რას მოიტანს, შედეგის მიხედვით ვიმსჯელებთ“, - განაცხადა ანდრია ჯაღმაიძემ.

ნინოწმინდის ბავშვთა პანსიონს დღეიდან მეუფე იაკობი უხელმძღვანელებს. ინფორმაცია ფორმულას საპატრიარქოს პრესმდივანმა მამა ანდრია ჯაღმაიძემ დაუდასტურა. 

გადაწყვეტილება ნინოწმინდის პანსიონის ხელმძღვანელის შეცვლასთან დაკავშირებით პატრიარქმა ილია მეიორემ მიიღო. მანამდე ადგილზე საპატრიარქოს წარმომადგენლები ჩავიდნენ. 

 

ნინოწმინდის პანსიონში, რომელსაც სხალთელი მთავარეპისკოპოსი სპირიდონი მართავდა, კვლავაც რჩება 23 ბავშვი. 

სახალხო დამცველს კი ისევ არ ეძლევა პანსიონში შესვლის საშუალება - ომბუდსმენს პანსიონში მთავარეპისკოპოსი სპირიდონი და საპატრიარქო დისკრიმინაციული მოტივით არ უშვებს. 

სახალხო დამცველი წლებია ლაპარაკობს საპატრიარქოს დაქვემდებარებულ პანსიონებში სავარაუდო ძალადობასა და დასჯის სასტიკ მეთოდებზე, თუმცა, ხელისუფლებას ამ პრობლემის მოსაგვარებლად სათანადო ნაბიჯები არ გადაუდგამს. 

პანსიონის ბენეფიციარები თავადაც ლაპარაკობენ დასჯის სასტიკ მეთოდებზე. საუბრობენ მუდმივად ცემაზე, მათ შორის სკამის ფეხებით და საზურგეებით. ასევე, დასჯის მეთოდად ასახელებენ კვების გამოტოვებას და სხვა ბავშვების ჭამის ყურების იძულებას და ცივი წყლით დაბანას. რამდენიმე აღსაზრდელმა ილაპარაკა გაუპატიურებაზეც. 

თბილისის საქალაქო სასამართლომ 5 ივნისს გამოიტანა განჩინება, რომლის მიხედვითაც, ნინოწმინდის პანსიონიდან შშმ ბავშვები დაუყოვნებლივ უნდა გამოიყვანონ და სხვა სახელმწიფო მზრუნველობის დაწესებულებაში გადაიყვანონ: მიმღებ ოჯახებში, მცირე საოჯახო ტიპის თავშესაფრებში ან დაბრუნდნენ ოჯახებში. 

განჩინების ამ დრომდე შეფერხებით მიდის. ადგილზე მუშაობენ სოციალური მუშაკები, თუმცა სახელმწიფო ზრუნვის სააგენტო მედიასთან საუბარს უკრძალავს. 

ნინოწმინდის პანსიონის ყოფილი აღსაზრდელები კი მუდმივი შანტაჟის ქვეშ არიან. ყოფილი ბენეფიციარების თქმით, მათგან მოითხოვენ, არ ილაპარაკონ და რაც უკვე საჯაროდ ან გამოძიებასთან თქვეს, უარყონ.

ერთ-ერთ აღსაზრდელს თავისი ბიძა მოკვლითაც დაემუქრა. ის მუქარის ბრალდებით დააკავეს. 

ასევე, ნინოწმინდის პანსიონთან დაკავშირებით პროკურატურაში გამოძიება კიდევ 4 საქმეზე მიმდინარეობს - სავარაუდო ძალადობის 3 ფაქტზე (სისხლის სამართლის კოდექსის 126-ე მუხლი) და სავარაუდო გაუპატიურების ერთ ფაქტზე (სისხლის სამართლის კოდექსის 137-ე მუხლი).‬

 


close დახურვა