სასამართლო სოსო გოგაშვილის აღკვეთის ღონისძიებაზე დახურულ რეჟიმში მსჯელობს

სასამართლო სოსო გოგაშვილის აღკვეთის ღონისძიებაზე დახურულ რეჟიმში მსჯელობს. 

სხდომის დახურვა პროკურატურამ მოითხოვა. ბრალდების მხარის თქმით, ეს აუცილებელია, ვინაიდან გოგაშვილის მიმართ არსებული ერთ-ერთი ბრალდება გრიფით საიდუმლო მასალებს შეიცავს. 

მოსამართლემ შუამდგომლობა დააკმაყოფილა. 

თუმცა, სხდომის დახურვამდე სოსო გოგაშვილს საშუალება მიეცა, თავისი დაკავების დეტალებზე ელაპარაკა. 

მან კიდევ ერთხელ თქვა, რომ იარაღი ჩაუდეს. ამაში გოგაშვილმა სუს-ის გენერალური ინსპექციის ხელმძღვანელი, გიორგი ღამბაშიძე დაადანაშაულა. მისი თქმით, დაკავებისას ყველაფერს სწორედ ღამბაშიძე აკონტროლებდა. 

სუს-ის უფროსის ყოფილმა მოადგილემ ასევე თქვა, რომ ის, დაკავებისას მისთვის მიყენებულ დაზიანებებთან დაკავშირებით სპეციალური საგამოძიებო სამსახურის წარმომადგენელმა გამოკითხა, ასევე, ჩაუტარდა ექსპერტიზა. 

***

სუს-ის უფროსის ყოფილი მოადგილე 3 მუხლით არის დაკავებული: ცეცხლსასროლი იარაღის მართლსაწინააღმდეგო შეძენა-შენახვა-ტარების, სამსახურეობრივი უფლებამოსილების გადამეტების და პირადი ცხოვრების ამსახველი ინფორმაციის ან პერსონალური მონაცემების ხელყოფის მუხლებით. 

სამსახურეობრივი უფლებამოსილების გადამეტების საქმეში, პროკურატურის განცხადებით, გრიფით საიდუმლო მასალებია. აქედან გამომდინარე, შესაძლოა, საქმის არსებითი განხილვა დახურულ რეჟიმში წარიმართოს. 

რაც შეეხება პირადი ცხოვრების ამსახველი ინფორმაციის ან პერსონალური მონაცემების ხელყოფის მუხლს - საუბარია რუსეთის 2 მოქალაქის, კონსტანტინე რომანოვსკის და დავით ადამიას საჩივრებზე, რომელთა საფუძველზეც არის დაკავებული სოსო გოგაშვილი. 

ამ ორი ადამიანის სახელი ტვ პირველის ეთერში გასულ ერთ-ერთ ინტერვიუში ახსენეს. ჟურნალისტმა ნოდარ მელაძემ გოგაშვილს ჰკითხა, ხომ არ იყო ეს ორი ადამიანი რუსეთის აგენტი, რაზეც გოგაშვილმა უპასუხა, რომ ჰქონდა ინფორმაცია მათ შესახებ. 

კონსტანტინე რომანოვსკიმ სოსო გოგაშვილს მორალური ზიანის მიყენებისთვისაც უჩივლა. 

რაც შეეხება იარაღის უკანონო შეძენა-შენახვა-ტარებას, გოგაშვილის დაცვის მხარე ამბობს, რომ სუს-ის უფროსის ყოფილი მოადგილის სახელზე 13 რეგისტრირებული იარაღია, ხოლო ის 2 დაურეგისტრირებელი იარაღი, რომლის უკანონო ფლობასაც ედავებიან, მას ჩაუდეს. 

სუს-ის უფროსის ყოფილი მოადგილე, სოსო გოგაშვილი 16 ივლისს, გამთენიისას სპეცოპერაციით დააკავეს. 

ადვოკატების თქმით, დაკავების შემდეგსოსო გოგაშვილს ჰქონდა ჯანმრთელობის პრობლემა - აქვს შეშუპებული ლოყა და კიდურებზე დაზიანებები აღენიშნება. 

ამასთან დაკავშირებით სპეციალურმა საგამოძიებო სამსახურმა გამოძიება დაიწყო. სავრაუდოდ, ჩატარდება ექსპერტიზაც. 

დაკავების დროს გაჩხრიკეს გოგაშვილის და მასთან დაკავშირებული ადამიანების სახლებიც. მისი შვილის თქმით, სახლებიდან წაიღეს ტელეფონები, კომპიუტერები, პლანშეტები, მეხსიერების ბარათები. 

დაკავებამდე რამდენიმე საათით ადრე სოსო გოგაშვილმა ფეისბუქზე დაწერა, რომ ჰქონდა 2021 წლის არჩევნების გაყალბების მტკიცებულებები, რომელიც "შესაბამის ორგანიზაციას" გადასცა. 

რამდენიმე დღის ადრე კი გია გაჩეჩილაძემ (უცნობი) აუდიოჩანაწერი გაავრცელა, რომელიც მთავარი არხის ჟურნალისტების ფარული მიყურადებით იყო მოპოვებული. აღნიშნულ აუდიოჩანაწერში საუბარი იყო სოსო გოგაშვილზეც

სოსო გოგაშვილმა ქართული ოცნება 2020 წლის ოქტომბერში დატოვა. ის სუს-ის უფროსის მოადგილედ 2015-2018 წლებში მუშაობდა. 2014 წელს შსს-ს გენინსპექციის უფროსი იყო. გოგაშვილი ხელმძღვანელობდა პანკისის ხეობაში ჩატარებულ სპეცოპერაციას, რა დროსაც 19 წლის თემირლან მაჩალიკაშვილი მოკლეს.