საერთაშორისო რესპუბლიკური ინსტიტუტის საზოგადოებრივი აზრის კვლევის თანახმად, ჯამში გამოკითხული მოსახლეობის 86% მხარს უჭერს საქართველოს ევროკავშირში გაწევრიანებას. ამის წინააღმდეგია 9%, ხოლო 5% აცხადებს, რომ არ იცის ან უარს ამბობს პასუხზე.
ამასთან, მოქალაქეებს, ვინც EU-ში გაწევრიანებას დაუჭირა მხარი, დაუსვეს კითხვა, მაინც დაუჭერენ თუ არა მხარს, თუ ეს რუსეთთან სავაჭრო კავშირების გაწყვეტას ნიშნავს - 55%-მა თქვა, რომ მხარდაჭერა უცვლელია, 19%-მა განაცხადა, რომ კვლავ დაუჭერს, თუმცა გარკვეულწილად ნაკლებად; 9%-ის თქმით, ამ ფაქტორის გათვალისწინებით, გარკვეულწილად ეწინააღმდეგება, ხოლო 8%-ის თქმით, მკაცრად ეწინააღმდეგება. ამასთან, 9%-მა უარი თქვა პასუხზე ან აღნიშნა, რომ არ იცის.
გარდა ამისა, გამოკითხული მოსახლეობის 51% ყველაზე მნიშვნელოვან პოლიტიკურ პარტნიორად ევროკავშირს ასახელებს. 32% - აშშ-ს; 19% - აზერბაიჯანს; 17% - თურქეთს, ხოლო 9% სომხეთს.
საქართველოსთვის ყველაზე მნიშვნელოვან ეკონომიკურ პარტნიორად კი ევროკავშირს გამოკითხული მოსახლეობის 43% მიიჩნევს, 31% - აშშ-ს; 28% - თურქეთს; 24% - აზერბაიჯანს; 16% - რუსეთს; 12% - უკრაინას.
რაც შეეხება NATO-ში გაწევრიანებას, მისი მომხრეა გამოკითხული მოსახლეობის 79%. 16% ამის წინააღმდეგია, ხოლო 6%-მა არ იცის ან უარს ამბობს პასუხზე.
IRI-ს კვლევის საველე სამუშაოები Polling & Marketing-მა ჩაატარა. კვლევა ჩატარდა 2023 წლის 14 სექტემბრიდან 14 ოქტომბრის პერიოდში, რესპონდენტებთან პირისპირი ინტერვიუს მეთოდით. გამოიკითხა საქართველოს 1200 მოქალაქე 18 წლის ზემოთ, ვისაც ხმის მიცემის უფლება აქვს და ეს რაოდენობა გენერალური მოსახლეობის ჭრილში რეპრეზენტატულია ასაკის, სქესის, რეგიონის და დასახლების ზომის მიხედვით. გამოპასუხების მაჩვენებელმა შეადგინა 73%, ცდომილების ზღვარი ±2.5 პროცენტული პუნქტია.
დახურვა