უკრაინის პრეზიდენტმა ვოლოდიმირ ზელენსკიმ განაცხადა, რომ აშშ-სა და უკრაინას შორის შეთანხმებული მშვიდობის გეგმის განახლებული ვერსია აღმოსავლეთ უკრაინიდან უკრაინული ჯარების შესაძლო გაყვანას ითვალისწინებს.
კიევში ჟურნალისტებთან საუბრისას ზელენსკიმ თქვა, რომ გეგმის მიხედვით დონბასის რეგიონი, რომლის დიდი ნაწილი რუსეთის კონტროლქვეშაა, შესაძლოა დემილიტარიზებულ „თავისუფალ ეკონომიკურ ზონად“ გადაიქცეს, სადაც არც უკრაინული და არც რუსული სამხედროები იქნებიან განთავსებული.
პრეზიდენტმა აღნიშნა, რომ უკრაინა ჯარების გაყვანას ეწინააღმდეგება, თუმცა არჩევანი ორია - „ომის გაგრძელება ან გადაწყვეტილებების მიღება ეკონომიკურ ზონებთან დაკავშირებით“.
მისი თქმით, განახლებული გეგმა ინარჩუნებს აშშ-ის, ნატოსა და ევროპელი პარტნიორების უსაფრთხოების გარანტიებს, რომლებიც ნატოს მეხუთე მუხლის პრინციპს გაუთანაბრდება. რუსეთის ახალი აგრესიის შემთხვევაში სანქციები ავტომატურად აღდგება.
გეგმა ასევე მოიცავს უკრაინის ევროკავშირში გაწევრიანების პერსპექტივის აღიარებას, რეპარაციების მოთხოვნის უფლებას და ქვეყნის აღსადგენად საინვესტიციო მექანიზმების შექმნას. შეთანხმების მიღწევის შემთხვევაში, ზელენსკის თქმით, ცეცხლის სრული შეწყვეტა დაუყოვნებლივ ამოქმედდება, ხოლო საბოლოო დამტკიცება რეფერენდუმსა და პარლამენტის რატიფიკაციას მოითხოვს.
დახურვა