უკრაინული დრონებით თავდასხმის შემდეგ "ლუკოილის" ყველაზე დიდი ნავთობქარხანა გაჩერდა

The Moscow Times-ს ინფორმაციით, უკრაინული დრონების დარტყმის შემდეგ "ლუკოილის" ყველაზე დიდმა ნავთობგადამამუშავებელმა ქარხანამ მუშაობა შეაჩერა.

გამოცემის ცნობით, რუსეთში სიმძლავრით მეოთხე და ბენზინის წარმოებით მეორე უმსხვილესი "ნიჟეგოროდნეფტეორგსინთეზის" [ნორსი] ნავთობგადამამუშავებელი ქარხანა ხუთშაბათს დრონებით შეტევის შედეგად დაზიანდა. დრონების შეტევისას ქარხანაში დაზიანდა პირველადი გადამუშავების მთავარი დანადგარი რომელიც საწარმოს სიმძლავრის დიდ ნაწილს უზრუნველყოფდა.

გამოცემა აღნიშნავს, რომ 2 ივლისიდან "ნორსიმ" შეწყვიტა საავტომობილო ბენზინისა და დიზელის საწვავის საბითუმო რეალიზაცია სანქტ-პეტერბურგის ბირჟაზე.

"ნორსი" გახდა მეხუთე რუსული ნავთობგადამამუშავებელი ქარხანა, რომელმაც  წარმოება შეაჩერა.

16 ივნისს ნავთობის გადამუშავება შეწყვიტა მოსკოვის "გაზპრომ ნეფტის" ნავთობგადამამუშავებელმა ქარხანამ, რომლის შეკეთება, Reuters-ის წყაროების თქმით, შესაძლოა 2027 წლამდე გაგრძელდეს.

12 ივნისიდან გაჩერებულია  "ტატნეფტი".

10 ივნისს მუშაობა შეწყვიტა კუიბიშევის ნავთობგადამამუშავებელმა ქარხანამ, ხოლო 1 ივნისს - ვოლგოგრადის ნავთობგადამამუშავებელმა ქარხანამ.

მარტის დასაწყისიდან უკრაინულმა დრონებმა რუსეთის ნავთობის ინდუსტრიის ობიექტებზე სულ მცირე 50-ჯერ განახორციელეს შეტევა. Energy Intelligence-ის შეფასებით, ამის შედეგად ივნისში რუსეთში ნავთობის გადამუშავების მოცულობა წლიურ ჭრილში 25%-ით შემცირდა, რაც 20 წელზე მეტი ხნის განმავლობაში ყველაზე დაბალი მაჩვენებელია.