კოლუმბიაში 7.4 მაგნიტუდის ძლიერ მიწისძვრას სულ მცირე 132 ადამიანი ემსხვერპლა, 480-ზე მეტი კი დაშავდა. ქვეყნის მასშტაბით საგანგებო მდგომარეობაა გამოცხადებული. დაღუპულთა და დაშავებულთა რაოდენობა, სავარაუდოდ, კიდევ გაიზრდება, რადგან ვრცელდება ინფორმაცია ნანგრევებში მოყოლილი ადამიანების შესახებ.
მიწისძვრა ორშაბათს, ადგილობრივი დროით 07:34 საათზე, ჩოკოს პროვინციაში, 103 კილომეტრის სიღრმეზე მოხდა. მისი ეპიცენტრი სოფელ სან-ხოსე-დელ-პალმართან მდებარეობდა, თუმცა ძლიერი ბიძგები ქვეყნის დასავლეთ ნაწილში, ასევე ვენესუელაში, ეკვადორსა და პანამაში იგრძნობოდა.
ყველაზე მეტად დაზიანდა ქალაქი პერეირა, სადაც სულ მცირე 40 ადამიანი დაიღუპა. ქალაქის მეტროპოლიტენურ ზონაში 65 შენობა ჩამოინგრა, მათგან 15-ში კი შესაძლოა ადამიანები იყვნენ ჩარჩენილი.
ძლიერი ნგრევა დაფიქსირდა კალიშიც, სადაც 32 შენობა ჩამოინგრა. მსხვერპლი და დაზიანებული შენობები ასევე არის მანისალესში, კიბდოში, მედელინსა და ჩოკოსა და ვალე-დელ-კაუკას რეგიონებში.
დაზიანდა რამდენიმე რეგიონული აეროპორტიც, მათ შორის პერეირის, მანისალესის, კიბდოს, არმენიის, კარტაგოსა და ბუენავენტურის აეროპორტები. დედაქალაქ ბოგოტაში შენობებზე ბზარები გაჩნდა, თუმცა მნიშვნელოვანი ინფრასტრუქტურული ზიანის შესახებ ინფორმაცია არ გავრცელებულა.
კოლუმბიის პრეზიდენტმა აბელარდო დე ლა ესპრიელამ ეროვნული კატასტროფის რეჟიმი გამოაცხადა და განაცხადა, რომ მიწისძვრის შედეგად 1 500-ზე მეტი საცხოვრებელი სახლი დაზიანდა. ხელისუფლება სამძებრო-სამაშველო სამუშაოებს აგრძელებს.
დახურვა