დღეიდან ქვეყანაში სავაჭრო ობიექტები იხურება
დღეიდან ქვეყანაში სავაჭრო ობიექტები იხურება. ამის შესახებ გადაწყვეტილება გუშინ მთავრობის ადმინისტრაციაში, უსაფრთხოების საბჭოს სხდომაზე მიიღეს. სასურსათო მაღაზიების, აფთიაქების, ბენზინგასამართი სადგურების, ბანკებისა და საფოსტო ქსელის გარდა, დაიკეტება ყველა სხვა ობიექტი. პრემიერ-მინისტრის განმარტებით, აკრძალვების აუცილებლობა ქვეყანაში კორნავირუსის შიდა გავრცელების შემთხვევების გამო დადგა.
კორონავირუსით ინფიცირებული 80 წლის ქალის მდგომარეობა მძიმეა
კორონავირუსით ინფიცირებული 80 წლის ქალის მდგომარეობა კვლავ მძიმეა. როგორც პირველი საუნივერსიტეტო კლინიკის დირექტორი ამბობს, პაციენტს ორმხრივი პნევმონია, ტემპერატურა და სუნთქვის უკმარისობა აღენიშნება. მისი ჯანმრთელობის მდგომარეობის გაუმჯობესების სიმპტომები ჯერჯერობით არ შეინიშნება.
ინფექციურ საავადმყოფოში 15 ტესტის პასუხს ელოდებიან
დღეს ელოდებიან ინფექციურ საავადმყოფოში მყოფი 15 პაციენტის ტესტის პასუხს კორონავირუსზე. ამჟამად კლინიკაში კოვიდ 19-ით ინფიცირებული 31 პაციენტი იმყოფება. მათ შორის 11-ს პნევმონია აღენიშნება. დამაკმაყოფილებელია არასრულწლოვნების მდგომარეობა. თუმცა, შედარებით მძიმე პაციენტად ითვლება 86 წლის ქალი. მას ნევროლოგიური დაავადება აქვს და ექიმები ვარაუდობენ, რომ მისი ჯანმრთელობის მდგომარეობა შესაძლოა გაუარესდეს. კლინიკის ბოქსირებული განყოფილების დირექტორის მარინა ენდელაძის თქმით, ექიმებს კონტაქტი აქვთ პირველ გამოჯანმრთელებულთანაც, რომელიც თავს კარგად გრძნობს. მეორე და მესამე პაციენტების გამოჯანმრთელებას კი ინფექციურში რამოდენიმე დღეში ელოდებიან. 20 მარტის მონაცემებით საქართველოში კორონავირუსი 40 პაციენტს დაუდგინდა, კარანტინის რეჟიმში 1575, სტაციონარში მეთვალყურეობის ქვეშ კი 275 ადამიანი იმყოფება.
დღეს საპატრიარქოში სინოდის სხდომა კორონავირუსზე იმსჯელებს
დღეს 12 საათზე საქართველოს საპატრიარქოში სინოდის სხდომაა ჩანიშნული. შეიცვლება თუ არა ზიარების წესი და შეიზღუდება თუ არა ტაძრებში ხალხმრავალი რიტუალები - სასულიერო პირებმა ამ და სხვა საკითხებზე უნდა იმსჯელონ. ვანის და ბაღდათის მიტროპოლიტი მეუფე ანტონი ფორმულა ნიუსთან საუბრისას ამბობს, რომ შეხვედრაზე კორონავირუსთან დაკავშირებით ეკლესიის მხრიდან გასატარებელ პრევენციულ ზომებზე უნდა იმსჯელონ, მისი თქმით ზიარების რიტუალის გაუქმება არ იგეგმება.
საბერძნეთში მყოფი ქართველები დახმარებას ითხოვენ
საბერძნეთში მყოფი საქართველოს მოქალაქეები დახმარებას ითხოვენ. ათენში ჩარჩენილი კაცის შვილი ფორმულასთან საუბრისას ამბობს, რომ მისი ოჯახის წევრი სპეცრეისის დანიშვნას აეროპორტში ელოდება, თუმცა საგარეო საქმეთა სამინისტროსა და საბერძნეთში საქართველოს საკონსულოში, ზუსტი პასუხი ფრენასთან დაკავშირებით არ აქვთ. ნათია ხარაზიშვილის თქმით, საბერძნეთიდან საქართველოში დაბრუნებას 500 ადამიანი ელოდება.
კორონავირუსით გამოწვეული უმუშევრობა საქართველოში
ეკონომიკური კრიზისის ფონზე ასობით ადამიანი უმუშევარი რჩება. რა ხედვა აქვს სახელმწიფოს კორონავირუსისგან გამოწვეულ ეკონომიკურ კრიზისზე. ადამიანის უფლებების სწავლებისა და მონიტორინგის ცენტრში აცხადებენ, რომ დამსაქმებელთა ნაწილი შექმნილი კრიზისული ფონიდან გამომდინარე დასაქმებულებს საარსებო მინიმუმის გარეშე ტოვებს. არასამთავრობო ორგანიზაციაში ამბობენ, რომ ასეთ ვითარებაში დამსაქმებლებს არათუ ამის უფლება არ აქვთ, არამედ ვალდებულები არიან შრომითი უფლებები დაიცვან. EMC-ში მიაჩნიათ, რომ ასეთ დროს დასაქმებულებს სახელმწიფო უნდა დაეხმაროს. გათავისუფლებული თანამშრომლები უკვე მიმართავენ დახმარებისთვის საქართველოს პროფესიულ კავშირს.
საქართველოში არსებულ მეჩეთებში ლოცვა შეჩერდება
საქართველოს მასშტაბით არსებულ მეჩეთებში ლოცვები შეჩერდება. გადაწყვეტილება სრულად საქართველოს მუსლიმთა ასოციაციამ მიიღო. მეჩეთები ღია იქნება ლოცვის ინდივიდუალურად მსურველთათვის. სრულად საქართველოს მუსლიმთა ასოციაციის მიერ გავრცელებულ განცხადებაში ვკითხულობთ, რომ ვინაიდან მსოფლიო და მათ შორის საქართველოც კორონავირუსის გავრცელების საფრთხის წინაშე დგას, მიღებულ იქნა ლოცვების დროებით შეჩერების გადაწყვეტილება.
თურქეთთან ავიამიმოსვლა ხვალ შეწყდება
ხვალიდან კორონავირუსის პრევენციის მიზნით თურქეთსა და საქართველოს შორის საავიაციო მიმოსვლა შეწყდება. როდის აღდგება ორ ქვეყანას შორის ფრენები ჯერჯერობით უცნობია. რაც შეეხება ქვეითთა მიმოსვლას, შეგახსენებთ, რომ თურქეთსა და საქართველოს შორის გადაადგილება 15 მარტს შეიზღუდა.
კორონავირუსით იტალიაში უკვე მეტი ადამიანია დაღუპული ვიდრე ჩინეთში
კორონავირუსით დაღუპულთა რაოდენობით იტალიამ ჩინეთს გაუსწრო.- ბოლო მონაცემებით იტალიაში კოვიდ 19-ს სწორედ 3,405 ადამიანი ემსხვერპლა, - 157-ით ნაკლები ვიდრე ჩინეთში. გვიან ღამით ბერგამოსა და მილანის ჩრდილო-აღმოსავლეთ ნაწილში სამხედრო სამსახურის სატვირთოები გამოჩნდა. გავრცელებული ინფორმაციით, ისინი პანდემიით დაღუპულთა ცხედრებს სავარაუდოდ კრემაციისთვის აგროვებენ. იტალიაში კარანტინი 12 მარტს გამოცხადდა. დაწესებული შეზღუდვების მიუხედავად ბოლო ერთ დღეში ქვეყანაში დაღუპულთა რიცხი 427-ით გაიზარდა. განსაკუთრებით მძიმეა 2 ათას 500-მდე იტალიელის ჯანმრთელობის მდგომარეობა. თუმცა უნდა ითქვას ისიც, რომ ქვეყნის მასშტაბით დაახლოებით 4 ათას 500 ადამიანი გამოჯანმრთელდა.. პანდემიით დაღუპულთა რიცხვი შეერთებულ შტატებში 10-ით, სამხრეთ კორეასა და ჩინეთში სამით გაიზარდა. ბოლო მონაცემებით, თურქეთში 4 ადამიანია გარდაცვლილი.ჯამში მსოფლიოში ახალი კორონავირუსი 245 ათასს ადამიანს აქვს დადასტურებული, დაღუპულთა რიცხვი კი 10 ათასს აჭარბებს.
facebook-ის მომხმარებლები კორონავირუსზე გადამოწმებულ ინფორმაციას მიიღებენ
მომავალი კვირიდან ფეისბუკის მომხმარებლები მობილურ აპლიკაციაში კორონავირუსის შესახებ გადამოწმებულ ინფორმაციას მიიღებენ. ამის შესახებ სოციალურ ქსელში მარკ ცუკერბერგი წერს. მისი თქმით, პლატფორმა უტყუარ ინფორმაციას მსოფლიო ჯანდაცვის ორგანიზაციისგან და სხვადასხვა ქვეყნების ოფიციალური უწყებებიდან მიიღებს. სოციალური ქსელის დამფუძნებელი მიიჩნევს, რომ მსოფლიოში პანდემიის დროს სწორედ ასე შეძლებენ ადამიანები პანიკას არ აყვნენ და მის გარშემომყოფებს დაეხმარონ. ფეისბუკმა კოვიდ 19-თან დაკავშირებით პლატფორმაზე სენსიტიური ინფორმაციის კონტროლი უკვე დაიწყო, ასევე დააანონსა, რომ 100 მილიონი დოლარით მცირე ბიზნესს დაეხმარება.
დახურვა