„ფლანგვის დეტექტორის“ მიერ გამოქვეყნებულ კვლევას ოპოზიცია ეხმიანება. ისინი აღნიშნულ ფაქტს პანდემიის დროს მოროდიორობად აფასებენ. მათივე განცხადებით, ხელისუფლება ცდილობს იმ კომპანიებს, რომლებიც მათ სასარგებლოდ საარჩევნო შემოწირულობებს ახორციელებს, თანხები მისცეს, რათა ეს თანხები ისევ 2020 წლის არჩევნებზე უკან დაუბრუნდეს.
„აღმოჩნდა, რომ სახელმწიფო უწყებები ყიდულობენ სწორედ ქართული ოცნების შემომწირველებისგან და ისეთი კომპანიებისგან, რომლებიც მათ შორის ბიუჯეტის ხარჯზე არიან დაფინანსებული და დაფუძნებულები იგივე „აწარმოე საქართველოს“ პროექტით. რატომ არის მნიშვნელოვანი, რომ ახლა გააქტიურდნენ ქართულ ოცნებასთან დაახლოებული კომპანიები პირბადეების შეკერვით? ეს იმიტომ ხდება, რომ ევროკავშირს გამოყოფილი აქვს უკვე 400 მილიონ ლარამდე, რომელიც დაიხარჯება ამ მიმართულებით საქართველოში და ფაქტიურად გრანტი, რომელიც უნდა შემოვიდეს ჩვენს ქვეყანაში, ახლა უკვე ტაციაობა მიდის 400 მილიონ ლარს ვინ წაიღებს. ნებისმიერ ქვეყანაში იმ ფაქტების გასაჯაროებით, რასაც აკეთებენ არასამთავრობო ორგანიზაციები და პოლიტიკური პარტიები, დაიწყებოდა გამოძიება,“- აცხადებს თბილისის საკრებულოს „ნაციონალური მოძრაობის“ წევრი ლევან ხაბეიშვილი.
„ევროპული საქართველოს“ წარმომადგენლის ლევან თარხნიშვილის განცხადებით, ხელისუფლება პანდემიის დროს შექმნილ ვითარებას საკუთარი ნათესავების და პარტნიორების გასამდიდრებლად იყენებს.
„ის რასაც ხელისუფლება ჩადის კორონავირუსის პირობებში არის მწვერვალი. მათ გამოიყენეს შექმნილი მძიმე ვითარება თავის ნათესავების, ახლობლების და პარტნიორების გამდიდრების მიზნით. ამ მხრივ გამოირჩევა ჯანდაცვის სამინისტრო და მის ქვეშ არსებული სტრუქტურები, რომლებმაც მილიონობით ლარი გააფორმეს გუშინ შექმნილ კომპანიებთან და ასევე მილიონი ლარი გადასცეს კომპანიებს, რომლებიც არიან სალომე ზურაბიშვილის თუ ქართული ოცნების პირდაპირი შემომწირველები“, - განაცხადა ლევან თარხნიშვილმა.
შეგახსენებთ, რომ არასამთავრობო ორგანიზაცია „ფლანგვის დეტექტორი“ ეპიდემიის დროს ჯანდაცვის სამინისტროს კორუფციულ გარიგებებში ადანაშაულებს. ორგანიზაცია ჯანდაცვის სამინისტროსგან ითხოვს გასაჯაროვდეს კონკრეტული კრიტერიუმები, რომლის მიხედვითაც ხელშეკრულების გაფორმება ხდება, რადგან კვლევის მიხედვით, ხელისუფლებამ სხვადასხვა კომპანიებისგან ათეულობით მილიონი ლარის შესყიდვა განახორციელა.
დახურვა