ბიუჯეტის კორექტირებული ვერსია პარლამენტში დღეს შევა. დოკუმენტი ბიუროს სხდომაზე უნდა დარეგისტრირდეს, რომელიც 15:00 საათზეა დანიშნული. დეპუტატები უკვე რამდენიმე თვეა ბიუჯეტის კორექტირებულ ვერსიას ელოდებიან, მთავრობას კი, დოკუმენტი ამ დრომდე არ წარუდგენია. ოპოზიციაში აცხადებენ, რომ მთავრობის ქმედებები არათანმიმდევრული და დაგვიანებულია. მათი თქმით, სამი თვის განმავლობაში ქვეყნის ეკონომიკა იყო გაჩერებული და მძიმე ვითარებას კიდევ უფრო ართულებდა სწორედ ის ფაქტი, რომ ხელისუფლებამ ბიუჯეტის კორექტირებული ვარიანტი დროულად არ წარმოადგინა.
„საჭიროა, რომ ხელისუფლებამ უარი თქვას საკუთარ კორუფციულ ხარჯებზე და ბიუროკრატიულ ფუფუნებაზე, ასეულობით მილიონ ლარზე. ვერც ერთ მათგანზე ვერ ამბობენ უარს სწორედ საარჩევნო და პოლიტიკური მიზნებიდან გამომდინარე. ამას ადასტურებს გამოქვეყნებული ძირითადი ციფრები, სადაც მხოლოდ 118 მილიონი ლარით მცირდება ბიუროკრატიაზე დასახარჯი თანხები, რომელიც რამდენიმე მილიარდ ლარს შეადგენს და რა თქმა უნდა, ეს ძალიან მცირედით შემცირებაა“, - განაცხადა „ევროპული საქართველოს“ წევრმა ირაკლი აბესაძემ.
ფრაქცია „ნაციონალური მოძრაობის“ თავმჯდომარის, რომან გოცირიძის თქმით, ბიუჯეტის პროექტის დაგვიანებით წარდგენა ნიშნავს, რომ მისი მიღება თვის ბოლომდე ვერ მოხდება და შესაბამისად, მოქალაქეები დაპირებულ დახმარებებს დროულად ვერ მიიღებენ.
„დღეს შემოტანილი ბიუჯეტი ნიშნავს იმას, რომ თვის ბოლოს იქნება მხოლოდ მიღებული. ანუ, მთელი ამ ერთი თვის განმავლობაში, ის დაპირებები, რაც მთავრობამ გასცა და ის ძალიან მწირი დანაპირები, დამამცირებელი მოქალაქეებისათვის, როდესაც ფაქტობრივად არაფერს აძლევენ, მისი საბიუჯეტო და სამართლებრივი უზრუნველყოფაც კი, გაიწელება დროში. ერთი რამ ნათელია, ის განცხადებები, რაც კეთდებოდა ამ ფულის განაწილებაზე და რომელთა საკმაო ნაწილი კორუფციული და არაეფექტიანი სქემით ნაწილდება, ბუნებრივია, რომ ეს დაუშვებელია“, - განაცხადა რომან გოცირიძემ.
რაც შეეხება მმართველი გუნდის პოზიციას, დარგობრივი ეკონომიკური კომიტეტის თავმჯდომარე რომან კაკულიამ აღნიშნა, რომ ბიუჯეტის დაგვიანების გამო კატასტროფული შედეგები მოსალოდნელი არ არის, თუმცა მისივე თქმით, კარგი იქნებოდა, მთავრობას დოკუმენტი უფრო ადრე გაესაჯაროვებინა.
„ჯანმრთელობის სრულყოფა მუდმივი პროცესია და ვფიქრობ, "ქართული ოცნება“ როდესაც წინასაარჩევნო კამპანიას შეუდგება ერთ-ერთი აქცენტი სწორედ ამაზე უნდა გააკეთოს, შეაფასოს ის გამოწვევები, რომელიც ამ სფეროში იყო. მე ნამდვილად იმ ადამიანთა რიგში ვიქნები, რომელიც შეეცდება, რომ ასეთი ტიპის ხარვეზები და გამოწვევები დასახელდეს და სააშკარაოზე იქნას გამოტანილი ყველა ის გამოწვევა, რომელსაც შეიძლება თავისი ობიექტური მიზეზებიც ჰქონდა“, - განაცხადა კაკულიამ.
კორექტირებული ბიუჯეტის პროექტზე საკომიტეტო მოსმენები გაიმართება. ამის შემდეგ დოკუმენტი მთავრობის ადმინისტრაციას დაუბრუნდება, რომ შესწორებები შევიდეს, თვის ბოლო კი, პროექტს პლენარულ სხდომაზე უყრიან კენჭს.
დახურვა