გადაცემაში „პოლიტიკის ფორმულა“ პარლამენტის წევრმა საკონსტიტუციო სასამართლოს თავმჯდომარედ მერაბ ტურავას დანიშვნაზე ისაუბრა და განაცხადა, რომ სასამართლოში ბოლო მომხდარმა ცვლილებებმა კონფიგურაცია გადაალაგა.
ჩუგოშვილის თქმით, იმ შემთხვევაში თუ საკონსტიტუციო სასამართლოს გადაწყვეტილებების ირგვლივ კითხვის ნიშნები გაჩნდა, ეს ქვეყნის იმიჯს დააზარალებს.
„კრიტიკა რაც გვქონდა ქვეყნის შიგნით და ქვეყნის გარეთ, ეს საკონსტიტუციო სასამართლოს უკვე წლებია არ ეხებოდა, ეს ეხებოდა საერთო სასამართლოებს, იუსტიციის საბჭოს. საკონსტიტუციო სასამართლო საკმაოდ დამოუკიდებლად ფუნქციონირებდა, საკმაოდ სერიოზული გადაწყვეტილებები აქვს მიღებული, საკმაოდ რთულ თემებზე აქვთ ასეთი პოზიციები დაფიქსირებული. ამ არჩევნებმა და ბოლო დანიშვნამ პლენუმის მხრიდან, ის დანიშვნა იყო აბსოლუტურად გაუმჭირვალე და პრობლემური. იმ დანიშვნამ სასამართლოში კონფიგურაცია გადაალაგა. თუ საკონსტიტუციო სასამართლოც იმოქმედებს იმდაგვარად, რომ მისი გადაწყვეტილებებიც კითხვის ნიშნის ქვეშ აღმოჩნდება, ეს მისთვის დამაზიანებელი იქნება. დამაზიანებელი იქნება ქვეყნის იმიჯისთვის. იმიჯზე მეტად იმაზე მეტად უნდა ვიდარდოთ, რომ ინსტიტუტები არ გვივარგა“, - განაცხადა ჩუგოშვილმა.
საკონსტიტუციო სასამართლოს ახალი თავჯდომარე ყავს, მერაბ ტურავამ საკონსტიტუციო სასამართლოს პლენუმის სხდომაზე 5 მოსამართლის ხმა მოიპოვა.
ტურავას მხარი დაუჭირეს მანანა კობახიძემ, ვასილ როინიშვილმა, ევა გოცირიძემ, თავად მერაბ ტურავამ და ხვიჩა კიკილაშვილმა.
აღსანიშნავია, რომ როინიშვილი და კიკილაშვილი დაინიშნენ პანდემიის პერიოდში და სწორედ მათ დანიშვნას უკავშირდებოდა საკონსტიტუციო სასამართლოში ე.წ. კლანის გაძლიერება.
შეგახსენებთ, 22 ივნისს „ფორმულამ“ ექსკლუზიური ინფორმაცია გაავრცელა, რომლის თანახმადაც, საკონსტიტუციო სასამართლოს მოსამართლის მანანა კობახიძის მხარდაჭერა, სასამართლოს ე.წ. კლანმა მისი ძმის, თედო კობახიძის დაწინაურების სანაცვლოდ მოიპოვა. სწორედ კობახიძის ხმა იყო გადამწყვეტი, რადგან 9 მოსამართლიდან 8-ის პოზიცია თავიდანვე ცნობილი იყო. მათგან 4 მერაბ ტურავას უჭერდა მხარს, 4 კი, ირინე იმერლიშვილს.
დახურვა