კომუნიკაციების კომისიაში ირწმუნებიან, რომ ელექტრონული კომუნიკაციების შესახებ კანონში დაგეგმილი ცვლილებები მაუწყებლებს არ ეხებათ. მედია ექსპერტებს კი, კახა ბექაურის არ სჯერათ და დარწმუნებულები არიან, რომ კანონპროექტი მედიაგარემოს დააზიანებს. ცვლილებების მთავარი მიზანი კი წინასაარჩევნოდ კრიტიკული მედიის საქმიანობაში ჩარევა და სიტყვის თავისუფლების შეზღუდვაა. ამის საილუსტრაციოდ მედიაკოალიციაში შემავალმა 11-მა არასამთავრობო ორგანიზაციამ სპეციალური განცხადება გაავრცელა და კანონპროექტის განხილვის შეჩერება, პროცესში კი, მაუწყებლებისა და დიპლომატიური კორპუსის ჩართვა მოითხოვა.
კომუნიკაციების კომისიის არ სჯერათ რეგიონულ მაუწყებელთა ასოციაციაშიც. მათთვის 25 რეგიონული ტელევიზია მაგალითია, რომ კომისია ცრუობს, როცა ამბობს, რომ ცვლილება მაუწყებლებს არ ეხება. რეგიონული მაუწყებლები პარალელურად ელექტრონული კომუნიკაციების კომპანიებიც არიან, რაც კანონის მიღების შემთხვევაში კახა ბექაურს საშუალებას მისცემს სპეციალური მმართველი მათაც დაუნიშნოს. ასეთ ტელევიზიებს შორისაა კავკასიაც.
კანონპროექტის განხილვის შეჩერებას მოითხოვენ სხვა მაუწყებლებიც, მათ შორის ტელეკომპანია ფორმულა. მაუწყებლების დასაბუთებით, ელექტრონული კომუნიკაციების მაუწყებლობისგან გამიჯვნა რთულია და ამ ორი სფეროს საქმიანობა ერთმანეთთან მჭიდროდაა დაკავშირებული და თუ სპეციალური მმართველი პროვაიდერებში შევა და გადაწყვეტილებებს დამოუკიდებლად მიიღებს ირიბად მედიაზეც აისახება.
კიდევ ერთი ჩანაწერი, რომელიც იურისტებს უმყარებს რწმენას, რომ კომისიას მთავრობასთან ერთად წინასაარჩევნოდ მედიის საქმიანობაში ჩარევა აქვს განზრახული, მაუწყებლის შესახებ კანონში დაგეგმილი ცვლილებებია. ახალი ჩანაწერით, კომისიის მიერ გამოცემული აქტების მოქმედება ვეღარ შეჩერდება და სასამართლოს გადაწყვეტილებამდე ძალაში დარჩება, რაც წინასაარჩევნოდ პოლიტიკური რეკლამის ნაწილში ჩარევის რისკებს აჩენს.
დრაკონული კანონი - ასე აფასებს ოპოზიციაში დაგეგმილ ცვლილებებს. მათი შეფასებით, მთავრობა კახა ბექაურთა ერთად გეგმას ასრულებს და მედიაზე კონტროლის კანონიერად გაფორმებას ცდილობს.
უსაფუძვლოა ბრალდებები ქართული ოცნებისთვის. ისინი ამტკიცებენ, რომ დაგეგმილი ცვლილება მაუწყებლებს არ ეხებათ, თუმცა კითხვაზე,რატომ არ წერია ეს კანონპროექტში არ პასუხობენ.
რატომ ახლა და რატომ დაჩქარებული წესით, თუ არ ჩავთვლით კომუნიკაციების კომისიის პრესსამსახურის მცირე განმარტებას, მარეგულირებელმა გაჩენილ კითხვებს პასუხი არ გასცა. ფორმულას ზარებს არც კახა ბექაურმა უპასუხა. კანონპროექტი კი პარლამენტში უკვე დარეგისტრირდა და განხილვა მიმდინარე კვირაში დაიწყება.
დახურვა