„ქართულ-ჯიგრული ურთიერთობები შევიდა ქართული ოცნების სისტემაში“, - ამის შესახებ განცხადებას „თავისუფალი დემოკრატების“ წევრი, ნინო გოგუაძე გადაცემა „პოლიტმეტრში“ აკეთებს. მისი განცხადებით, ამ ხელისუფლების მმართველობის პერიოდში პოლიტიკური გავლენები საკმარისია, რათა სხვადსხვა საქმეების გამოძიება არ მოხდეს. ამის მაგალითად ნინო გოგუაძეს, ხორავას ქუჩაზე მომხდარი მკვლელობა მოჰყავს და აცხადებს, რომ მსგავსი საქმეების გამოუძიებლობა სისტემის წახალისებად შეიძლება ჩაითვალოს.
„ქართულ-ჯიგრული ურთიერთობები შევიდა ქართული ოცნების სისტემაში. გარდა იმისა, რომ პოლიტიკურ ნებას ასრულებს ქართული ოცნების სისტემა, სხვადასხვა სტრუქტურების პოლიტიკური გავლენებიც კი შეიძლება გამოყენებულ იქნას იმისთვის, რომ ამა თუ იმ საქმეზე სამართლიანობა არ აღსრულდეს და სამართალი არ დადგეს. ამის ყველაზე ნათელი მაგალითი არის ხორავას საქმე. იქ თავიდან არ შეიძლებოდა ყოფილიყო პოლიტიკური შეკვეთა, მაგრამ ჩვენ ვნახეთ, რომ შედარებით დაბალი ჩინოვნიკების ინტერესი და გავლენები საკმარისი აღმოჩნდა იმისთვის, რომ ეს საქმე ასე გაფუჭებულიყო, ჩაეფარცხათ. ჩვენ მივიღეთ სიტუაცია, როდესაც სასამართლომ გვითხრა, რომ მკვლელი არ არსებობს.
გაშიშვლდა მთელი სისტემა და იმის მაგივრად, რომ ამაზე ჰქონოდათ რეაქცია, ვინმე დასჯილი გინახავთ? ვინმეს პასუხისმგებლობის საკითხი დამდგარა, რომ არ შეასრულეს თავისი უფლება-მოვალეობა? ეს ძალიან საშიშია და სისტემის წახალისებად შეიძლება ჩაითვალოს“, - აცხადებს ნინო გოგუაძე.
დახურვა