"სასაცილოა ასე რომ გამოდიან ბიძინა ივანიშვილის ადიუტანტები და დებატებს გვთავაზობენ", - ასე გამოეხმაურა ნაციონალური მოძრაობის წევრი ხატია დეკანოიძე ქართული ოცნების ერთ-ერთი ლიდერის, მამუკა მდინარაძის განცხადებას, რომელმაც ოპოზიციას "ჯანსაღ სატელევიზიო დებატებში" მონაწილეობისკენ მოუწოდა.
როგორც დეკანოიძემ აღნიშნა, ოპოზიცია მმართველ გუნდს დებატებს მთელი წინასაარჩევნო პერიოდის განმავლობაში სთავაზობდა, თუმცა უშედეგოდ.
მისივე თქმით, დებატები ოცნების კომფორტზე არ უნდა იყოს მორგებული და მასში ყველა ტელევიზიამ უნდა მიიღოს მონაწილეობა.
"რა დებატებზე გვესაუბრებიან? მთელი წინასაარჩევნო პერიოდი ყველა არხი, გარდა ამისა, ჩვენ ვიწვევდით დებატებში ჩვენს კონკურენტებს, მაგალითად მაჟორიტარობის კანდიდატებს, პროგრამაზე სასაუბროდ, მაგრამ ოცნებას ხომ პროგრამა არ ჰქონია, მთელი მათი პროგრამა იყო სიძულვილის ენაზე და დაჭერებზე აგებული. შესაბამისად, სასაცილოა მათი მხრიდან ასე რომ გამოდიან და ბიძინა ივანიშვილის ადიუტანტები გვთავაზობენ დებატებს. ქართული ოცნების კომფორტულ ზონაზე კი არ უნდა იყოს დებატი, უნდა იყოს ყველა არხის მონაწილეობით, ყველა იმ ჟურნალისტის მონაწილეობით, რომელიც არ არის ხელისუფლების მომხრე, არ არის ჩართული სამთავრობო პროპაგანდაში და აქვს სურვილი, რომ დაუსვას შეკითხვა ხელისუფლებას", - აცხადებს დეკანოიძე.
მანვე თქვა, რომ მმართველი გუნდის წარმომადგენლები, რომლებიც დღეს დებატებზე საუბრობენ, რეალურად გადაწყვეტილების მიმღები პირები არ არიან.
"სიმართლე გითხრათ, მეცინება, ვის უნდა ვედებატოთ? რომელი წყვეტს ახალი არჩევნები დაინიშნება თუ არა? კობახიძე, წულუკიანი, ღარიბაშვილი თუ მდინარაძე? რომელ მათგანს შეუძლია კონკრეტული გადაწყვეტილების მიღება?", - განაცხადა ხატია დეკანოიძემ.
საპარლამენტო უმრავლესობის ლიდერმა მამუკა მდინარაძემ დღეს, 19 ნოემბერს, ოპოზიციას კიდევ ერთხელ მოუწოდა, "ჯანსაღ სატელევიზიო დებატებში" მონაწილეობა მიიღონ.
ოპოზიციას სატელევიზიო დებატები რუსთავი 2-ის ეთერიდან თავდაპირველად ირაკლი კობახიძემ შესთავაზა. საპასუხოდ, ოპოზიციამ მოითხოვა, რომ დებატები ყველა ნაციონალური მაუწყებლის მონაწილეობით მოეწყოს.
დახურვა