ლელო საქართველოსთვის წევრი დავით უსუფაშვილი აცხადებს, რომ ოპოზიცია-ხელისუფლების მესამე რაუნდმა გარკვეული პოზიტიური ნაბიჯები წარმოაჩინა.
როგორც უსუფაშვილმა გადაცემაში სოფო ზურაბიანის პოლიტიკის ფორმულა განაცხადა, მნიშვნელოვანია, რომ შეთანხმება მე-10 მოწვევის პარლამენტის პირველ სხდომამდე შედგეს, თუმცა აქვე განმარტავს, რომ თუ ეს ასე არ მოხდება, ამით მოლაპარაკებების პროცესი არ დასრულდება.
აქვე, პოლიტიკოსი ამბობს, რომ ოპოზიციის პოზიციონირება სამართლებრივად გამართულია.
"ქართული ოცნების პოლიტიკური აკვიატებაა, რომ ერთპარტიული მმართველობის გარდა ვერაფერი, სხვანაირი მმართველობა ვერ წარმოუდგენია, ამიტომ გააკეთა ის რაც გააკეთა ამ არჩევნებზე. ამან მოიყარა თავი 31 ოქტომბრის არჩევნებში და კრიზისიც არის ქვეყანაში. ის 4-პუნქტიანი გეგმაც ჩემთვის არის სინამდვილეში 1-პუნქტიანი - საჭიროა პოლიტიკური გამოსავალი. მესამე რაუნდზე ისხდნენ ადამიანები, რომლებიც ერთი მხრიდან წარმოადგენდნენ საქართველოს მილიონ მოქალაქეს, პლუს მინუს რამდენიმე ათასი, და მეორე მხარესაც 1 მილიონი მოქალაქის მიერ არჩეული ადამიანები. საქართველოს ამ მოსახლეობის შეთანხმებაზეა საუბარი და არა უსუფაშვილის თუ თალაკვაძის, კობახიძის თუ ბაქრაძის. ამ პროცესს სჭირდება სერიოზული მიდგომა. ოპოზიციის პოზიციონირება არის კონსტიტუციური და სამართლებრივი. გაუგონარს არაფერს ვითხოვთ. დრო არის ცოტა დარჩენილი, მაგრამ საკმარისია შეთანხმების მისაღწევად...მესამე რაუნდმა გარკვეული პოზიტიური ნაბიჯები წარმოაჩინა. ჯერ არაფერი არც მიღწეულია, არც დაკარგულა. გვაქვს გარკვეული წყალგამყოფივით. ძალიან მნიშვნელოვანია, რომ პარლამენტის პირველ დღემდე მოხერხდეს შეთანხმება, თუმცა ამ დღით არ იხურება და არ მთავრდება ყველაფერი, უბრალოდ შემდგომ პერიოდში უფრო ძვირი შეიძლება დაუჯდეს ქვეყანას ის პროცესები, რომელიც განვითარდება, თორე გამოსავალი მაინც არის არჩევნები, მაგრამ იმ არჩევნებამდე მივალთ ძიძგილაობით, ჯაჯგურით და სხვა ქმედებებით, რომლებიც მოსახლეობისთვის ნაკლებად სასარგებლოა, თუ მივალთ მიღწეული შეთანხმებით, რომლის შედეგადაც უზრუნველფოლი იქნება პოლიტიკური სტაბილურობა, ეს დევს სასწორზე", - განაცხადა უსუფაშვილმა.
უსუფაშვილი მიიჩნევს, რომ ხელისუფლება ჯერ კიდევ ფიქრობს, რომ რომელიმე ოპოზიციური პარტია ან პარტიის რამდენიმე წევრი დაითანხმოს პარლამენტში შესვლაზე.
"არ შეიძლება ამ პროცესში ჩართული მხარე, პირველ რიგში ხელისუფლება ცხადია, ვიყოთ კონცენტრირებული პრობლემების მოკვარახჭინებაზე - "აბა იქნებ რამდენიმე პარტიის წევრი ან პარტია დავითანხმო, რომ შემოვიდეს პარლამენტში, მივაღწიო იმას რომ ერთპარტიული არ იყოს პარლამენტი", დაკავებული. ხელისუფლება არის ჯერ კიდევ ამით დაკავებული და მოლაპარაკებებიც ამას ემსახურება, რომ ეს დაკავებულობა სხვა დაკავებულობით შევცვალოთ", - აღნიშნა მან.
საქართველოში პოლიტიკური კრიზისი 31 ოქტომბრის საპარლამენტო არჩევნებს მოჰყვა. ოპოზიცია არჩევნებს გაყალბებულად მიიჩნევს და ოფიციალურ შედეგებს არ აღიარებს. ამ დრომდე ყველა ოპოზიციური პარტია უარს ამბობს პარლამენტში შესვლაზე.
კრიზისის ფონზე, დიპლომატიური კორპუსის ჩართულობით, ოპოზიციასა და ხელისუფლებას შორის ამ დრომდე მოლაპარაკების სამი რაუნდი გაიმართა. პარლამენტის შეკრების დრო ახლოვდება, თუმცა მოლაპარაკებები რაიმე კონკრეტულ შედეგამდე ჯერჯერობით არ მისულა. ოპოზიციის მოთხოვნა ახალი საარჩევნო ადმინისტრაციის პირობებში ახალი არჩევნების ჩატარება და პოლიტიკური პატიმრების გათავისუფლებაა. ხელისუფლება ამ დრომდე ამბობს, რომ რიგგარეშე არჩევნების ჩატარებას არ განიხილავს.
ოპოზიციამ ხელისუფლებას წერილობითი შეთავაზებაც გაუკეთა - ჩამოთვლილ საკითხებთან ერთად შეთავაზების ერთერთი პუნქტი 2021 წლის შემოდგომაზე რიგგარეშე არჩევნების დანიშვნის შესახებ პლებისციტის ჩატარებაა.
შეთავაზებაზე, რომლის დოკუმენტიც ფორმულამ მოიპოვა, ვრცლად წაიკითხეთ აქ. სწორედ ეს შეთავაზება განიხილეს მოლაპარაკების მესამე რაუნდზე, რომელიც 7 დეკემბერს გაიმართა. შეხვედრის შემდეგ სხვადასხვა ოპოზიციური პარტიის ლიდერებმა თქვეს, რომ გარკვეულ საკითხებზე მხარეების პოზიციები დაახლოვდა, თუმცა ზოგიერთ მთავარ საკითხზე ეს ვერ მოხერხდა.
შეხვედრიდან გამოსულმა არჩილ თალაკვაძემ, რომელიც, ირაკლი კობახიძესთან ერთად, მოლაპარაკებებზე ხელისუფლებას წარმოადგენდა, თქვა, რომ განმეორებით არჩევნებს ან პლებისციტს ქართული ოცნება არ განიხილავს. თუ ოპოზიციის მოთხოვნები არ დაკმაყოფილდება და მათი ერთიანი ბოიკოტიც ძალაში დარჩა, დამოუკიდებელი საქართველოს ისტორიაში პირველად ერთპარტიული პარლამენტი შეიკრიბება.
დახურვა