კულტურული მემკვიდრეობის ძეგლთა დაცვის სააგენტოდან და ეროვნული მუზეუმიდან გათავისუფლებული ადამიანები სამართლებრივ დავას იწყებენ.
სასამართლოში მათ უფლებებს საია, სოციალური სამართლიანობის ცენტრი და ISFED დაიცავენ.
ორგანიზაციების განცხადებით, სასამართლო დავის საფუძველი იქნება ის, რომ დასაქმებულთა მხრიდან ახალი მინისტრის მიერ დაგეგმილ მნიშვნელოვან ცვლილებებთან დაკავშირებით პროფესიული და განსხვავებული პოზიციების გამოხატვას დაუსაბუთებელი და დისკრიმინაციული გათავისუფლება მოჰყვა.
გათავისუფლებულები ხაზს უსვამენ, რომ ძირითადი საკადრო წმენდა მაშინ დაიწყო, როდესაც მუზეუმის დირექტორად უსამართლოდ დაინიშნა ამ პოზიციისთვის შეუსაბამო კვალიფიკაციის მქონე კადრი, ნიკა ახალბედაშვილი - იურისტი, რომელიც მანამდე, თეა წულუკიანის მინისტრობის დროს, იუსტიციის სამინისტროში მუშაობდა.
კულტურის სამინისტროდან გათავისუფლებული ადამიანები პროტესტს გამოთქვამენ იმის გამოც, რომ რეორგანიზაციას წინ უძღოდა კულტურული მემკვიდრეობის დაცვის სააგენტოში ჯერ მოვალეობის შემსრულებლად იურისტ ლევან ხიზანიშვილის, შემდეგ კი კულტურის სამინისტროს ინსპექციის სამსახურის ყოფილი უფროსის, ნიკოლოზ აზნაურაშვილის დანიშვნა.
გათავისუფლებულები ამბობენ, რომ მუზეუმის და სააგენტოს რეორგანიზაცია უსამართლოდ და გაუმჭვირვალედ წარიმართა, ამასთან, მუზეუმიდან მათი დათხოვნის ერთადერთი მიზეზი თეა წულუკიანის და მის მიერ ამ დაწესებულებებში განახლებული ადმინისტრაციების საკადრო პოლიტიკაა, რომელიც რეორგანიზაციას კვალიფიკაციის ნიშნით არ აწარმოებს და მხოლოდ მათ მიმართ ლოიალურად განწყობილი თანამშრომლების შენარჩუნებაზეა ორიენტირებული.
საია, ისფედი და სოციალური სამართლიანობის ცენტრი ხაზს უსვამენ, რომ მუზეუმიდან და ძეგლთა დაცვის სააგენტოდან გათავისუფლებულია ყველა ის ადამიანი, რომელიც ხელს აწერდა საინიციატივო ჯგუფის "ხელოვნების მუზეუმისთვის" პეტიციას მუზეუმის ისტორიული შენობის გადარჩენის, უსამართლო საკადრო პოლიტიკის და საჯარო ინფორმაციის გაუცემლობის შესახებ.
ორგანიზაციები ასევე ლაპარაკობენ თეა წულუკიანის ხელთ არსებულ მანიპულაციურ ბერკეტებზე, რომელთა საშუალებითაც ის გათავისუფლებულ თუ ჩამოქვეითებულ თანამშრომლეთა დაშინებას ცდილობს, რათა მათ თავი შეიკავონ სასამართლო დავებისგან.
მაგალითად, დაქვეითებულ და გათავისუფლებულ თანამშრომელთა მხრიდან ორგანიზებულ წინააღმდეგობაში ჩართვის შემდეგ, სოციალური სამართლიანობის ცენტრის დაცვის ქვეშ მყოფი ერთი პირი, რომელიც პოზიციურ დაქვეითებას (უკანონო გადანიშვნის ფაქტს) ასაჩივრებდა, მოგვიანებით სამსახურიდან გაათავისუფლეს.
ორგანიზაციებმა ხაზი გაუსვეს თეა წულუკიანის 22 იანვრის ინტერვიუს, რომელშიც მან დათხოვნილი თანამშრომლებს სხვადასხვა ბრალდება წაუყენა. NGO-ების შეფასებით, ეს გულისხმობდა მუქარას საგამოძიებო მოქმედებების დაწყებასთან დაკავშირებით.
"საზოგადოებას შევახსენებთ, რომ გათავისუფლებული არიან სამუზეუმო საქმის და კულტურული მემკვიდრეობის დაცვის უმაღლესი კლასის სპეციალისტები. თითოეული მათგანის პროფესიული რეპუტაცია, სამეცნიერო ხარისხი და კვლევები კარგადაა ცნობილი პროფესიულ წრეებში. შესაბამისად, ამ მასშტაბით კვალიფიციური პროფესიონალის თანამდებობიდან გათავისუფლება აუხსნელი და კულტურის სფეროსთვის მნიშვნელოვანი ზიანის მომტანი გადაწყვეტილებაა.
სოციალური სამართლიანობის ცენტრი, საია და ISFED გააგრძელებენ უკანონოდ გათავისუფლებული თანამშრომლების სამართლებრივ მხარდაჭერასა და მათი ინტერესების დაცვის მიზნით ახალი სარჩელების მომზადებას. მინისტრ წულუკიანს მოვუწოდებთ, შეწყვიტოს კულტურის სფეროს მაღალპროფესიონალი კადრების დევნა მათი პროფესიული და განსხვავებული მოსაზრებების გამო და გაითვალისწინოს გათავისუფლებული თანამშრომლების ორგანიზებული წინააღმდეგობის მოთხოვნა, შესაბამისი კომპეტენციისა და გამოცდილების ადამიანებს მიეცეს საშუალება, გააგრძელონ მუშაობა საქართველოს კულტურული მემკვიდრეობის ძეგლების, სამუზეუმო ექსპონატებისა და ეროვნული საგანძურის დასაცავად". - აცხადებენ ორგანიზაციები.
***
მას შემდეგ, რაც თეა წულუკიანი კულტურის მინისტრი გახდა, შალვა ამირანაშვილის სახელობის ხელოვნების მუზეუმიდან ათობით თანამშრომელი გაათავისუფლეს. სამინისტროს განცხადებით, ეს რეორგანიზაციის ფარგლებში მოხდა, თავად გათავისუფლებულები კი პოლიტიკურ მოტივებზე ლაპარაკობენ.
ეროვნული მუზეუმის თანამშრომლებს თეა წულუკიანი მის "გამოშიგვნასა" და არაპროფესიონალიზმში ადანაშაულებს, კულტურული მემკვიდრეობის ძეგლთა დაცვის სააგენტოს თანამშრომლებს კი გელათის რეაბილიტაციასთან დაკავშირებულ პრობლემებში სდებს ბრალს.
გარდა ამისა, თეა წულუკიანი ეროვნული მუზეუმის შენობის ნაწილობრივ დანგრევას გეგმავს - 2021 წლის 22 ივლისს გასაჯაროვდა დასკვნა, რომლის მიხედვითაც, "შალვა ამირანაშვილის ხელოვნების მუზეუმის ისტორიული შენობის ნაწილის აღდგენა არარენტაბელურია, მეორე ნაწილის რღვევის შეჩერება კი შეუძლებელია და, შესაბამისად, უმჯობესია მუზეუმის ეს ნაწილი დაინგრეს და იმავე მასალებით ახალი აშენდეს".
ხელოვნების მუზეუმის შენობა ისტორიულია, ის 1838 წელს ააგეს და ევროპული არქიტექტურის ნიმუშია, ამასთან, მუზეუმების ქუჩის ერთ-ერთი მთავარი კომპონენტია. ხელოვნებათმცოდნეები შენობის დანგრევას კატეგორიულად ეწინააღმდეგებოდნენ. მათივე შეფასებით, საფრთხე ექმნება მუზეუმში დაცულ ასობით ექსპონატს. მათთვის მიუღეველია მუზეუმთან დაკავშირებული სამოქმედო გეგმაც.
დახურვა