პარტია ევროპელი სოციალისტების ლიდერმა და საქართველოს პარლამენტის დეპუტატმა, ფრიდონ ინჯიამ 2022 წელს 186 000 ევროდ ვერტმფრენი შეიძინა. ინფორმაცია 2023 წლის 30 მარტს გამოქვეყნებულ მის ქონებრივ დეკლარაციაშია აღნიშნული.
დოკუმენტის ბოლო სექციაში, სადაც ასახულია ის ხარჯები, რომლებიც 5 000 ლარს აღემატება და დეკლარაციის სხვა ფურცლებზე არაა მითითებული, აღნიშნულია, რომ ინჯიამ 2022 წლის 1-ლი იანვრიდან, 30 დეკემბრამდე პერიოდში, ვერტმფრენის შესაძენად 186 075 ევრო გადაიხადა.
დეკლარაციის მიხედვით, ინჯიამ 2022 წლის განმავლობაში ანაზღაურების სახით საქართველოს პარლამენტიდან 57 703.08 ლარი მიიღო, რაც თვეში 4 808.59 ლარს უდრის.
მოძრავი ქონება
ქონებრივი დეკლარაციის მიხედვით, დეპუტატი და მისი ოჯახი ფლობს დიდძალ მოძრავ თუ უძრავ ქონებას. მათ ასევე აქვთ წილები სხვადასხვა კომპანიაში, ფლობენ აქციებსა და ობლიგაციებს.
დოკუმენტში ასახულია, რომ ფრიდონ ინჯიამ სხვადასხვა დროს შეიძინა 3 მსუბუქი ავტომობილი, რომელთა ღირებულებაც 200 000 ლარიდან 113 600 ევრომდეა.
დეკლარაციის მიხედვით, მსუბუქ ავტომობილს ფლობს მისი მეუღლე, ლალი რუხიაც. დოკუმენტში 11 500 ლარის ღირებულების ცეცხლსასროლი იარაღი კი ნაჩუქარ ნივთადაა გაფორმებული.
უძრავი ქონება
დეკლარაციის დოკუმენტის პირველი 9 გვერდი შევსებულია იმ უძრავი ქონების საცხოვრებელი და არასაცხოვრებელი ფართებისა და მიწის ნაკვეთების სიით, რომელსაც ფრიდონ ინჯია და მისი მეუღლე სრულად ან ნაწილობრივ ფლობენ. ოჯახი დიდძალ ქონებას ფლობს როგორც ლარში, ასევე დოლარშიც.
ჯამში ფრიდონ ინჯია და მისი მეუღლე საქართველოს ტერიტორიაზე 1.181 მილიონი ლარის და 900 000-მდე დოლარის ღირებულების უძრავი ქონების 100%-ს ფლობენ.
იმ უძრავი ქონების ღირებულება რომლის 100%-საც ფრიდონ ინჯია ფლობს 703 575 ლარს შეადგენს.
ის პოლიტკოვსკაიას ქუჩაზე მდებარე შენობის 45%-ის მფლობელიცაა, რომლის სრული ღირებულებაც 2 086 929 - ლარს შეადგენს და საერთო ფართობი 16 725 კვ.მ-ია.
დეპუტატი ასევე 822 400 დოლარის ღირებულების უძრავ ქონებასა და მიწის ნაკვეთების სრული მფლობელია.
მისი ცოლის ლალი რუხაიას სახელზე კი 478 000 ლარის ღირებულების უძრავი ქონების 100% არის გაფორმებული, რაც შეეხება დოლარში არსებულ უძრავ ქონებას, ლალი რუხაიას სახელზე არსებული უძრავი ქონების ღირებულება 69 400 დოლარის შეადგენს.
პარტია ევროპელი სოციალისტები, რომლის ერთ-ერთი ლიდერიც ფრიდონ ინჯიაა, საქართველოს პარლამენტში ქართული ოცნების სატელიტად მიიჩნევა.
ბოლო დღეებში ქართული ოცნების სატელიტურ ჯგუფებში "ლგბტ პროპაგანდის" აკრძალვის საკითხი აქტუალური გახადა.
ძალადობრივმა, პრორუსულმა ჯგუფმა ალტ-ინფომ პარლამენტში გასული წლის ნოემბერში დაარეგისტრირა კანონპროექტი, რომელშიც აღნიშნულია, რომ ცვლილება უნდა შევიდეს შეკრებისა და მანიფესტაციის შესახებ კანონში და გაჩნდეს შემდეგი მუხლი: "აკრძალულია შეკრების ან მანიფესტაციის ჩატარება, თუ იგი მიზნად ისახავს ან რომლის დროსაც შესაძლოა, ადგილი ჰქონდეს სექსუალური ორიენტაციის დემონსტრირებას, პოპულარიზაციას ან/და პროპაგანდას".
ფრიდონ ინჯიამ 2 მაისს განაცხადა, რომ "ლგბტ პროპაგანდა" უნდა აიკრძალოს. მისივე თქმით, შესაბამისი კანონპროექტის მომზადებასაც გეგმავს.
ინჯია ამტკიცებს, რომ არ ჰქონია კომუნიკაცია ქართულ ოცნებასთან და მომღერალ უცნობის აქციის ორგანიზატორებთან, სადაც გაჟღერდა მსგავსი შინაარსის მოთხოვნები. გარდა ამისა, დეპუტატი აცხადებს, რომ არ იცნობს პრორუსული დაჯგუფების, ალტ-ინფოს კანონპროექტს, რომელიც პარლამენტში გასული წლის ნოემბერში დარეგისტრირდა.
დახურვა