კოპალეიშვილი კობახიძეს: თქვენ იყავით გავრილოვი რომ ჩამოიყვანეთ ამ საქართველოში

საკონსტიტუციო სასამართლოში პრეზიდენტის იმპიჩმენტის საკითხის განხილვა გრძელდება - ამ ეტაპზე, მხარეები კითხვების ფორმატზე გადავიდნენ, რომლის ფარგლებშიც მცირე სიტყვიერი დაპირისპირება იყო.

ირაკლი კობახიძემ პრეზიდენტის წარმომადგენელს, მაია კოპალეიშვილს უთხრა, რომ "ეს ადეიშვილის სასამართლო" არ არის და "წესიერად" ესაუბრა.

"ეს ადეიშვილს სასამართლო კი არ არის, ეს არის საკონსტიტუციო სასამართლო და წესიერად ილაპარაკეთ. ადეიშვილის სასამართლო არ არის და არც გვარამიას, ვისი მოადგილეც იყავით წლების განმავლობაში. რომ ამაყობთ [ამით], ეგაა თქვენი პრობლემა", - უთხრა კობახიძემ კოპალეიშვილს.

მაია კოპალეიშვილმა კი კობახიძეს უთხრა, რომ საქართველოში გავრილოვი მან ჩამოიყვანა და პარლამენტის სავარძელში ჩასვა. "სამართლებრივ ჩარჩოებში იქნებ დავრჩეთ, მაცადეთ საუბარი, ერთი წამი", უპასუხა კობახიძემ კოპალეიშვილს.

"თქვენ სამაგიეროდ... თქვენ იყავით გავრილოვი რომ ჩამოიყვანეთ ამ საქართველოში, რომ ჩასვით იმ პარლამენტის სავარძელში, თქვენ იყავით", - თქვა კოპალეიშვილმა.

დღეს საკონსტიტუციო სასამართლოში პრეზიდენტის იმპიჩმენტის წარდგინების განხილვა გრძელდება. 

საქმეს პლენუმი განიხილავს. პრეზიდენტი პროცესს არ ესწრება. მისი წარმომადგენლები კი თამარ ჩუგოშვილი და მაია კოპალეიშვილი არიან. 

გადაწყვეტილების მისაღებად პლენუმს 2 კვირა აქვს. თუ საკონსტიტუციო სასამართლო სალომე ზურაბიშვილის მხრიდან კონსტიტუციის დარღვევას დაადგენს, პოლიტიკური პროცესი პარლამენტში გადაინაცვლებს. 

პრეზიდენტის იმპიჩმენტისთვის საჭიროა პარლამენტის 2/3, ანუ 100 დეპუტატის ხმა. ამ ეტაპისთვის ქართულ ოცნებას საჭირო მხარდაჭერა არ აქვს. 

პირველ სექტემბერს ცნობილი გახდა, რომ ქართული ოცნება სალომე ზურაბიშვილის წინააღმდეგ იმპიჩმენტის პროცედურას იწყებს. მიზეზად პარტიაში მთავრობის უარის მიუხედავად, პრეზიდენტის ევროპაში გამგზავრება დაასახელეს, რითაც მან "უხეშად დაარღვია კონსტიტუცია".

30 აგვისტოს საქართველოს მთავრობამ პრეზიდენტ სალომე ზურაბიშვილის ევროპაში ვიზიტის პარალელურად განცხადება გამოაქვეყნა და აღნიშნა, რომ მას ყველა მოთხოვნილ ვიზიტზე უარი უთხრეს, მათ შორის, უკრაინაში.