აშშ-ის პრეზიდენტის, დონალდ ტრამპის ადმინისტრაცია იმ ქვეყნებისგან, რომლებსაც „მშვიდობის საბჭოს“ მუდმივი წევრობა სურთ, მინიმუმ 1 მილიარდი დოლარის შენატანს ითხოვს.
Bloomberg-ის მიერ მოპოვებული წესდების პროექტის მიხედვით, ტრამპი იქნება მისი პირველი თავმჯდომარე და თავად გადაწყვეტს, თუ ვის მიიწვევს წევრებად.
გადაწყვეტილებები მიიღება ხმათა უმრავლესობით (თითოეულ წევრ ქვეყანას ექნება ერთი ხმა), თუმცა ყველა მათგანი დაექვემდებარება თავმჯდომარის დამტკიცებას.
„თითოეული წევრი ქვეყანა იმსახურებს არაუმეტეს სამი წლის ვადით წესდების ძალაში შესვლიდან, თავმჯდომარის მიერ ვადის გაგრძელების უფლებით. წევრობის სამწლიანი ვადა არ გავრცელდება იმ წევრ ქვეყნებზე, რომლებიც წესდების ძალაში შესვლიდან პირველი წლის განმავლობაში „მშვიდობის საბჭოში“ ნაღდი ფულის სახით 1,000,000,000 აშშ დოლარზე მეტს შეიტანენ“, - ნათქვამია პროექტში.
კრიტიკოსები შიშობენ, რომ ტრამპი ცდილობს შექმნას გაერთიანებული ერების ორგანიზაციის (UN) ალტერნატივა ან მეტოქე ორგანო, რომელსაც იგი დიდი ხანია აკრიტიკებს.
წესდებაში საბჭო აღწერილია, როგორც „საერთაშორისო ორგანიზაცია, რომელიც მიზნად ისახავს სტაბილურობის ხელშეწყობას, საიმედო და კანონიერი მმართველობის აღდგენას და ხანგრძლივი მშვიდობის უზრუნველყოფას კონფლიქტის შედეგად დაზარალებულ ან საფრთხის ქვეშ მყოფ რეგიონებში“.
ის ოფიციალურად ამოქმედდება მას შემდეგ, რაც წესდებას სამი წევრი ქვეყანა დაეთანხმება.
ტრამპმა უკვე მიიწვია რამდენიმე მსოფლიო ლიდერი, მათ შორის არგენტინის პრეზიდენტი ხავიერ მილეი და კანადის პრემიერ-მინისტრი მარკ კარნი, რათა გახდნენ „ღაზის მშვიდობის საბჭოს“ ნაწილი, რომელიც მისი ახალი „მშვიდობის საბჭოს“ უფრო ფართო ქოლგის ქვეშ ჩამოყალიბდება.
დახურვა