აშშ-ს საკვებისა და წამლის ადმინისტრაციამ (FDA) კოვიდის მკურნალობისთვის Pfizer-ის ანტივირუსულ აბებს - Paxlovid-ს ავტორიზაცია მიანიჭა.
ეს არის კოვიდის სამკურნალოდ ავტორიზებული პირველი ანტივირუსული ტაბლეტი, რომელსაც მომხმარებელი სახლშიც გამოიყენებს მანამ, სანამ იმდენად ავად გახდება, რომ საავადმყოფოში გადაყვანა დასჭირდება. ტაბლეტის მიღებას ექიმის დანიშნულების შესაბამისად შეძლებენ ინფიცირებული, 12 წლის ზემოთ რისკჯგუფში შემავალი პირები, რომლებიც სულ მცირე 39,9 კილოგრამს იწონიან. FDA-ს განცხადების თანახმად, ტაბლეტების მიღება რეკომენდებულია კოვიდის დიაგნოზის დასმიდან მალევე და სიმპტომების გამოვლენიდან ხუთი დღის განმავლობაში.
გასულ კვირას Pfizer-მა გამოაქვეყნა კვლევის შედეგები, რომლის თანახმადაც, აღნიშნული აბებით მკურნალობა 89 პროცენტით ამცირებს ჰოსპიტალიზაციის ან გარდაცვალების რისკებს. FDA-მ დააზუსტა, რომ Paxlovid არაა განკუთვნილი კოვიდის პრევენციისთვის და არ ანაცვლებს ვაქცინაციას.
"Paxlovid-ის დღევანდელი ავტორიზაცია არის კიდევ ერთი შესანიშნავია მაგალითი იმისა, თუ როგორ დაგვეხმარება მეცნიერება საბოლოო ჯამში დავამარცხოთ პანდემია, რომელიც ორი წლის თავზეც აგრძელებს მსოფლიოს გარშემო სიცოცხლეების განადგურებას", - განაცხადა Pfizer-ის აღმასრულებელმა დირექტორმა, ალბერტ ბურლამ. მისივე თქმით, კომპანია მზადაა, აშშ-სთვის პრეპარატის მიწოდება დაიწყოს.
დახურვა