ისრაელის არმია აცხადებს, რომ გასულ ღამეს განხორციელებული თავდასხმების დროს ჰამასის ერთ-ერთი მეთაური მოკლეს. IDF-ის ინფორმაციით, ასემ აბუ რაკაბა 7 ოქტომბერს ტერორისტების მიერ ისრაელის სამხედრო პუნქტებზე შეტევაზე იყო პასუხისმგებელი.
"აბუ რაკაბა პასუხისმგებელი იყო ჰამასის დრონებზე, პარაპლანებზე, საჰაერო თავდაცვაზე. ის მონაწილეობდა 7 ოქტომბრის ხოცვა-ჟლეტის დაგეგმვაში და ბრძანებებს აძლევდა ტერორისტებს, რომლებიც ისრაელში პარაპლანებით შეიჭრნენ და IDF-ის ობიექტებზე დრონებით დაესხნენ თავს", - აცხადებენ ისრაელის თავდაცვის ძალებში.
7 ოქტომბერს ღაზას სექტორიდან ისრაელის მიმართულებით ათობით რაკეტა გაუშვეს. ქვეყნის მასშტაბით განგაშის სირენები ამოქმედდა. თავდასხმაზე პასუხისმგებლობა პალესტინურმა დაჯგუფება ჰამასმა აიღო და თქვა, რომ 20 წუთში 5 000 რაკეტა გამოიყენეს.
გავრცელებულ შეტყობინებაში, ჰამასის სამხედრო მეთაურმა, მოჰამედ დეიფმა ამას ოპერაცია "ალ-აკსას წარღვნა" უწოდა და პალესტინელებს შეერთებისკენ მოუწოდა.
ისრაელის შეიარაღებულმა ძალებმა ჰამასის წინააღმდეგ საპასუხო დარტყმები განახორციელეს - მათ სამხედროების მობილიზება დაიწყეს და "საომარი მდგომარეობის" შესახებ გაფრთხილება გამოაცხადეს.
ისრაელის პრემიერმინისტრმა, ბენიამინ ნეთანიაჰუმ ამას ომი უწოდა - მისი თქმით, წინ ხანგრძლივი ბრძოლა ელით, თუმცა ისრაელი ომს მოიგებს, ხოლო ჰამასი პასუხს აგებს ამ ქმედებებისთვის.
დახურვა