ომის კვლევის ამერიკული ინსტიტუტის (ISW) ინფორმაციით, რუსეთი რეზერვისტებისგან Storm Z სპეცრაზმს აყალიბებს, რომელსაც ურბანული ბრძოლების ჩასატარებლად გამოიყენებს. მათ ჩვეულებრივი ჯარის სტრუქტურის გარეთ ჩამოაყალიბებენ და შემდეგ არსებულ ბატალიონებთან გააერთიანებენ.
ISW-ის ცნობით, საუბარია ახალ რაზმებზე, რომელთა გამოყენება იგეგმება მე-8 გაერთიანებული შეიარაღების ჯარის, 1-ლი ჯარის კორპუსის ("DPR" ფორმირებების) შემადგენლობებში.
ISW ხაზს უსვამს იმას, რომ რუსეთის თავდაცვის სამინისტროს ჯარის კორპუსის გარეთ ასეთი სპეცრაზმის შექმნა ფაქტობრივად ანადგურებს საკუთარი არმიის სამხედრო სტრუქტურას.
"Storm Z შექმნილია საბრძოლო ოპერაციების ჩასატარებლად ქალაქებში ან რთულ გეოგრაფიულ რაიონებში მნიშვნელოვანი და სტრატეგიული ობიექტების ხელში ჩაგდების მიზნით, როგორიცაა ციხესიმაგრეები, სამეთაურო პუნქტები და საკომუნიკაციო ცენტრები", - ნათქვამია ორგანიზაციის მოხსენებაში.
ფრონტის ხაზზე გაშვებამდე ამ სპეცდანიშნულების რაზმების წვრთნისთვის გამოყოფილია 10-15 დღე. სავარაუდოა, Storm Z რაზმი განლაგდება ავდიივკა-დონეცკის ფრონტის ხაზის გასწვრივ რუსეთის წარუმატებელი შეტევითი ოპერაციების მხარდასაჭერად.
"რუსი სამხედრო მეთაურები სავარაუდოდ ცდილობენ შექმნან Storm Z რაზმები და მიამაგრონ ისინი უკვე აქტიურ ელემენტებს, რათა გააძლიერონ მცირე ტაქტიკური წარმატებები და წაახალისონ შემდგომი შეტევითი ოპერაციები და მიღწევები", - წერია მოხსენებაში.
დახურვა