საქართველოს უნივერსიტეტი ეწინააღმდეგება რუსულ კანონს და აღნიშნავს, რომ საქართველოსთვის ევროპული მომავლის უზრუნველყოფა უმთავრესი მიზანია.
გავრცელებულ განცხადებაში უნივერსიტეტი ემიჯნება ქვეყანაში იმგვარი ინსტიტუციების ჩამოყალიბებას, რაც შესაძლოა რუსულ რეჟიმთან გვაახლოებდეს.
"ჩვენ ვიზიარებთ ლიბერალურ-ჰუმანურ ღირებულებებს და საკუთარ მისიად მიგვაჩნია საქართველოს დემოკრატიული განვითარების ხელშეწყობა, ამ პროცესში აქტიური თანამონაწილეობით. ჩვენი ღირებულებებიდან გამომდინარე, ყოვლად მიუღებლად მიგვაჩნია ის პრინციპები, რომლებითაც დღევანდელი რუსეთი იმართება.
შესაბამისად, სრულიად ვემიჯნებით საკუთარ ქვეყანაში იმგვარი ინსტიტუციების ჩამოყალიბებას, რაც შესაძლოა რუსულ რეჟიმთან გვაახლოებდეს. ისტორიულად, ყოველთვის, როცა საქართველო აღწევდა დამოუკიდებლობას, ის მიისწრაფოდა ევროპულ ქვეყნებთან კოალიციისკენ. ასე იყო, როგორც ანტიკურ, ისე შუასაუკუნეებსა თუ თანამედროვე ეპოქებშიც.
გაერთიანებულნი იმ სულისკვეთებით, რომ ჩვენი ადგილი ევროპაშია, ვგმობთ, სახელმწიფოს მხრიდან იმგვარ ქმედებას, რაც შესაძლოა დაბრკოლებად იქცეს ამ მიზნის მიღწევის გზაზე. აქედან გამომდინარე, სრულიად ვეწინააღმდეგებით „უცხოური გავლენის გამჭვირვალობის შესახებ“ საქართველოს კანონის მიღებას. მიგვაჩნია, რომ საქართველოსთვის ევროპული მომავლის უზრუნველყოფა, არის ჩვენი თაობის უმთავრესი მიზანი ისტორიის მოცემულ ეტაპზე, ვალდებულება მომავლის წინაშე"- ნათქვამია განცხადებაში.
დახურვა